Եգիպտոսը Իսրայելից հետ է կանչում իր դեսպանին

Եգիպտոսը Իսրայելից հետ է կանչում իր դեսպանին:

Դեսպանին հետ կանչելու պատճառը, ըստ lenta.ru-ի, 2 երկրների սահմանին 5 եգիպտացի ոստիկանի սպանությունն է, որոնք զոհվել են իսրայելական զինվորականների եւ պաղեստինյան գրոհայինների միջեւ օգոստոսի 18-ին տեղի ունեցած փոխհրաձգության ժամանակ։

Եգիպտոսը մեղադրում է Իսրայելին իր քաղաքացիների սպանության մեջ եւ զգուշացնում, որ դեսպանն Իսրայել չի վերադառնա այնքան ժամանակ, մինչեւ գործի առիթով հետաքննություն չանցկացվի:

Իսրայելն, իր հերթին, հայտարարել է, որ որեւէ կապ չունի եգիպտական ոստիկանների սպանության հետ, սակայն խոստացել է մանրամասն հետաքննություն անցկացնել:

Երեկ երեկոյան Կահիրեում Իսրայելի դեսպանատան մոտ ավելի քան 200 մարդ բողոքի ակցիա է անցկացրել` քննադատելով անտարբերությունը ոստիկանների մահվան նկատմամբ: