Վաճառել միայն դեղատոմսով

«Դիսկոտեկային» նոր թմրանյութը` մեֆեդրոնը, արագորեն տարածվում է բրիտանական երիտասարդության շրջանում: Միացյալ Թագավորության յուրաքանչյուր 25-րդ երիտասարդը խոստովանում է, որ անցյալ տարի գոնե մեկ անգամ օգտագործել է M-Cat կամ «մյաու-մյաու» կոչվող թմրանյութը. գրում է The Daily Mail-ը:

Փաստորեն, ավելի քան 300 հազար մարդ օգտագործում է մեֆեդրոն, որը տարածվածությամբ երկրորդ թմրանյութն է 16-24- տարեկանների շրջանում` կոկաինից հետո: Այն դժվար չէ գնել դեղատներում. մեֆեդրոնը վաճառվում է որպես սննդային հավելում կամ աղ լոգանքների համար: Մեկ փաթեթի գինը 20-25 ֆունտ է:

Այդ սպիտակ փոշին թմրանյութ է ճանաչվել 3 տարի առաջ: Մեֆեդրոնը կախվածություն է առաջացնում, նաեւ տագնապալի, նույնիսկ պարանոիդալ վիճակների պատճառ դառնում: Ազդում է սրտամկանի, նյարդային համակարգի վրա, կարող է մահվան հանգեցնել:

Լուրն ի գիտություն մեր առողջապահության նախարարությանը. եթե մեր դեղատներում էլ է վաճառվում այդ դեղամիջոցը, վաճառեք միայն դեղատոմսերով: