Ոչնչացնում են իրենց ոճրագործության հետքերը

Հայոց ցեղասպանության վերաբերյալ թուրքական արխիվային փաստաթղթերը ոչնչացվել են կամ խեղաթյուրվել. ասվում Wikileaks-ի գաղտնազերծած փաստաթղթերից մեկում, որը հրապարակել է Լիբանանում լույս տեսնող «Ալ Ջումհուրիա» թերթը:

Փաստաթուղթը, որը Ստամբուլի ամերիկյան հյուպատոսության գաղտնի տեղեկագիրն է թվագրվում է 2004 թվականի հուլիսի 12-ով եւ ներառում է թուրք եւ օտար պատմաբանների վկայություններն ու մեկնաբանություններ Հայոց ցեղասպանության մասին:

Ըստ թուրք պատմաբան Հալիլ Բերքթայի` ցեղասպանության վերաբերյալ փաստաթղթերի առաջին «մաքրազարդումը» կատարվել է 1918 թվականին, երկրորդը` Թուրքիայի նախկին նախագահ Թուրղութ Օզալի կողմից: Պատմաբանը, վկայակոչելով թուրք դեսպան Մոհարամ Նուրի Բիրջին, նշում է, որ վերջինս անձամբ զբաղվել է փաստաթղթերի խեղաթյուրմամբ եւ խոստովանել. «Մենք իսկապես մորթել ենք հայերին»:

Իսկ ամերիկացի հետազոտող Թոնի Քրենոութը վկայել է, որ թուրք բարձրաստիճան զինվորականները հատուկ հրաման են ունեցել` վերացնել Թուրքիայի արխիվներում պահվող` Հայոց ցեղասպանության վերաբերյալ միլիոնավոր փաստաթղթերը: