Ազարյանի արժանիքների մասին հարցրեք ԿԸՀ անդամներից

«Ես հրաժարվել եմ մրցույթին մասնակցելուց հետո եւ խնդրում եմ այս մասին այլեւս չխոսել»,- այսօր լրագրողներին դիմեց ԿԸՀ նորընտիր նախագահ Գարեգին Ազարյանը` ըստ էության հերքելով ՄԻՊ-ի կողմից հայտարարած մրցույթով հանձնաժողովի անդամ չդառնալուց հետո արած իր մեկ այլ հայտարարությունը, թե ինքն ինքնաբացարկ է հայտարարել: Մինչդեռ ՄԻՊ գրասենյակից լրագրողներին հայտնել էին, որ Ազարյանը մասնակցել է մրցույթին եւ, ինչպես մյուս թեկնածուներին, նրան եւս հարցեր էին տվել:

Ազարյանն ասաց, որ նոր ընդունված Ընտրական օրենսգրքից եւ նոր ձեւավորված ԿԸՀ-ից հետո ինքը` որպես ԿԸՀ նախագահ, ինչպես նաեւ ԿԸՀ անդամները, շատ ավելի կարեւոր գործեր ունեն անելու, քան մամուլի հրապարակումների հետ հաշվի նստելը:

Լրագրողների հարցին, թե ի՞նչ է պատրաստվում անել առաջիկա ընտրություններում հասարակության վստահությունը բարձրացնելու համար, ԿԸՀ նախագահը պատասխանեց, որ ինքը ստորագրել է մի տեքստի տակ, որը պարտավորեցնում է աշխատել անաչառ եւ օրենքի սահմաններում:

Իսկ երբ լրագրողները հետաքրքրվեցին, թե ո՞ր արժանիքների համար է Գարեգին Ազարյանը կրկին ընտրվել ԿԸՀ նախագահ, նա խորհուրդ տվեց այդ մասին հարցնել ԿԸՀ անդամներին: