ԼՂ հարցում բեկումնային լուծում են ակնկալում

Ադրբեջանը չի ցանկանում փոխել այսօրվա ստատուս քվոն, քանի որ հասկանում է` ստատուս քվոյի ցանկացած փոփոխություն` նույնիսկ իրենց պատկերացմամբ, դրական լուծում ավելի մեծ խնդիրներ է առաջացնում ոչ թե պետության, այլ Ալիեւի կլանի համար. այս մասին այսօր լրագրողների հետ հանդիպման ժամանակ հայտարարեց Եվրոպական ինտեգրացիայի վարչության անդամ, քաղաքական վերլուծաբան Մանվել Ղումաշյանը:

Նրա համոզմամբ` Արցախյան հարցի ձգձգումը ձեռնտու է Ադրբեջանի նախագահին եւ նրա շրջապատին, քանի որ նրանք հաճախ շահարկում են այդ գործոնը` ժողովրդին ասելով` իբր դեռ հողեր ունեն ետ բերելու: Իսկ հարցի լուծումից հետո ժողովուրդը կասի` «եթե մենք մինչեւ հիմա մենք վատ էինք ապրում, զրկանքներ էինք կրում դրա համար, ապա ինչու հիմա էլ ենք նույն կերպ ապրում»:

Մանվել Ղումաշյանի խոսքերով` բոլորը գիտեն, որ «նավթի վրա նստած ավտորիտար համակարգը» հենց այսպես է զարգանում եւ չի բացառվում, որ Ադրբեջանում կառաջանա նույն իրավիճակը, ինչ տեղի է ունենում նավթաշատ արաբական երկրներում:

Այս հանգամանքով էլ բանախոսը բացատրում է կազանյան հանդիպման տապալումը Ադրբեջանի կողմից, երբ գրեթե պատրաստ փաստաթուղթը չստորագրվեց, քանի որ Ադրբեջանն առաջ քաշեց 10 նախապայման` ճիշտ այնպես, ինչպես «ֆոկուսնիկը գլխարկի մեջից նապաստակ է հանում»:

Եվ այս պարագայում համանախագահ երկրների եւ հատկապես` ՌԴ նախագահ Դմիտրի Մեդվեդեւի հիասթափության եւ վրդովմունքի պատճառն ակնհայտ է դառնում: Իսկ միջնորդները ԼՂ հարցի բեկումնային լուծում են ակնկալում, որպեսզի իսպառ վերանա պատերազմի վերսկսման հավանականությունը, եւ տարածաշրջանում որոշակի տնտեսական ծրագրեր ստեղծելու հնարավորություն ստեղծվի: