Ջրահեղձման դեպքերն ավելացել են

Շիրակի մարզի ջրային տարածքները նախատեսված չեն լողալու համար եւ չեն հսկվում համապատասխան ծառայությունների կողմից:

Այդ պատճառով, Շիրակի մարզպետ Աշոտ Գիզիրյանի որոշմամբ, մարզի փրկարարական վարչությունը զանգվածային լրատվամիջոցներով զգուշացնելու է ազգաբնակչությանը զերծ մնալ ջրամբարները, լճերը, լճակներն ու գետակները որպես լողավազաններ օգտագործելուց:

Ինչպես «Երկիր»-ին տեղեկացրեց մարզի փրկարարական վարչության պետ Մարատ Սարիբեկյանը, Շիրակի տարածքում կան գետեր ու գետակներ, լճակներ, յոթ ջրամբար: Նա ներկայացրեց նաեւ վիճակագրական տվյալները, որոնք մտահոգիչ են. 2008 թվականին մարզում գրանցվել է ջրահեղձման 3 դեպք, 2009-ին` 1, 2010-ին` 4, իսկ այս տարվա միայն մեկ ամսվա ընթացքում` 2 դեպք:

«Դեռ տարին չավարտված` արդեն երկու դեպք ունենք, դա արդեն շատ է: Դիմում եմ ազգաբնակչությանը` զերծ մնալ արգելված տարածքներում լողալուց»,- ասաց վարչության պետը: