Հայոց ցեղասպանության վերաբերյալ երկու բանաձեւ` Կնեսետում

Իսրայելի խորհրդարանը` Կնեսետը, այսօր որոշում է կայացրել, ըստ որի` ապրիլի 24-ը Իսրայելում հիշատակման օր ճանաչելու մասին բանաձեւը դրվելու է կրթության եւ մշակույթի հանձնաժողովի քննարկմանը:

Եթե փաստաթուղթը հավանության արժանանա, ապրիլի 24-ին Իսրայելի դպրոցներում Հայոց ցեղասպանության մասին դասեր կանցկացվեն:

Այս տարվա մայիսի 18-ին Կնեսետն իր լիագումար նիստում քննարկել էր մեկ այլ` Հայոց ցեղասպանության ճանաչման մասին բանաձեւի հարցը եւ այն եւս փոխանցել կրթության եւ մշակույթի հանձնաժողովի քննարկմանը:

Կնեսետի հաջորդ լիագումար նիստը տեղի կունենա սեպտեմբերին:

Նշենք, որ 2008 թվականից ի վեր  Հայոց ցեղասպանության վերաբերյալ բանաձեւեր Իսրայելի խորհրդարան են ներկայացվել 4 անգամ: