Բժշկի անփութության պատճառով հիվանդը մահացել է

Ոստիկանության Շիրակի մարզի քննչական բաժնում ավարտվել է բժիշկ-գինեկոլոգ Ֆ. Մադոյանի կողմից մասնագիտական պարտականությունները ոչ պատշաճ կատարելու դեպքի առթիվ հարուցված քրեական գործի նախաքննությունը:

ՀՀ գլխավոր դատախազության կայքից տեղեկանում ենք, որ նախաքննությամբ պարզվել և հիմնավորվել է, որ Գյումրու թիվ 1 պոլիկլինիկայի բժիշկ-գինեկոլոգ Ֆ. Մադոյանը հիվանդին հետազոտելիս իր մասնագիտական պարտականությունները պատշաճ չի կատարել, նրա անփութության հետեւանքով հիվանդն ընկել է անաֆիլատիկ շոկի մեջ և, գիտակցության չգալով, մահացել է:

Ձեռք բերված ապացույցների հիման վրա Ֆ. Մադոյանին մեղադրանք է առաջադրվել ՀՀ քրեական օրենսգրքի 130-րդ հոդվածի 2-րդ մասով և որպես խափանման միջոց ընտրվել է ստորագրություն չհեռանալու մասին: Քրեական գործն ուղարկվել է Շիրակի մարզի ընդհանուր իրավասության առաջին ատյանի դատարան` ըստ էության քննելու: