ԺՈՂՈՎՈՒՐԴ. Մասոնները` ըստ Ահարոնի և մեր աղբյուրի

Մամուլով հաղորդվեց, որ հուլիսի 1-11-ը Երևանում ` Armenia Marriot հյուրանոցում, տեղի է ունենալու մասոնների համաշխարհային հավաք:

Ինչպես մեզ հաջողվեց պարզել, Հայաստանի գերագույն օթյակի ղեկավարն է ոմն Ահարոն, սակայն ոչ Ահարոն Ադիբեկյանը: Այդ մասին հայտնեց ինքը` Ահարոն Ադիբեկյանը` ավելացնելով, որ այդ Ահարոնը ինքը չէ: Իսկ այն մյուս Ահարոնը մենեջեր է և աշխատում է Հայաստանում գործող միջազգային մեծ ընկերությունում:

Բացի այն Ահարոնից, որ ինքը չէ, Ադիբեկյանը ճանաչում է հայկական ևս երեք մասոնների, այդ թվում` ռեստորանատիրոջ: Ըստ նրա` Հայաստանում մինչ այժմ գործող հանաշխարհային մասոնական երեք տարբեր` ֆրանսիական, ռուսական և ամերիկյան օթյակների մի քանի տասնյակ անդամների թվում չկան ռազմաքաղաքական գործիչներ, նրանք բացառապես գործարար և մշակութային աշխարհի ներկայացուցիչներ են:

Սոցիոլոգիայի տվյալներով, սակայն, ներկայումս փորձ է արվում մասոնական տարածաշրջանային կենտրոնի դերը Վրաստանից փոխանցել Հայաստանին: «Մասոնական շարժման կենտրոնը Անդրկովկասում դառնում է Հայաստանը: Եթե Վրաստանում կամ Ադրբեջանում մեկին վարպետի կոչում տան, պետք է գա, Հայաստանում այդ կոչումը ստանա: Սա Հայաստանի համար մեծ առաջխաղացում ա»,- նշեց Ահարոն Ադիբեկյանը, որի տվյալներով` մասոնական համաշխարհային կառույցում դրված է Հայաստանում գործող ֆրանսիական, ռուսական և ամերիկյան երեք տարբեր օթյակները մեկ հայկականում միավորելու հարցը: