Հայաստանում է բարեգործության և ամուսնանալու նպատակով

Արթուր Աբրահամը Հայաստանում է: Նա 2-3 շաբաթ կհանգստանա, ապա կմեկնի Գերմանիա` որակավորման մենամարտեր անցկացնելու և աշխարհի առաջնությանը մասնակցելու նպատակով:

Այսօր լրագրողների հետ հանդիպման ժամանակ հայազգի բռնցքամարտիկը նշեց, որ ԱՄՆ-ը ներկայացնող Անդրե Ուորդի հետ  վերջին մենամարտում իր պարտության պատճառը տակտիկական սխալն էր. «Սկսեցի ավելի շատ պաշտպանվել և ուզում էի պաշտպանության միջոցով հասնել նոկաուտի, ցավոք, դա չստացվեց»: Սակայն համոզված է` կորցրածը հնարավոր է հետ բերել:

Խոսելով իր ծրագրերի մասին` բռնցքամարտիկը պատմեց, որ Հայաստան գալն ունի երկու նպատակ, նախ` 100 հազար եվրոյի օգնություն է տրամադրելու Ենգիբարյանի անվան դպրոցին, որտեղ ինքը 4 տարի մարզվել է, նաև ամուսնանալու է, ըստ նրա` «օբյեկտը կա, աշխատանքներ են տարվում»:

Արթուր Աբրահամի ծրագրերում է նաև Հայաստանում բռնցքամարտի և օտար լեզուների դպրոց բացելը: Մարզիկները դպրոցում կսովորեն գերմաներեն և անգլերեն, ինչը հնարավորություն կտա լուրջ հաջողությունների հասնել արտերկրում:

Անուշ ԱՄԻՐԲԵԿՅԱՆ