Հայկական երգը` թուրքական եթերում (տեսանյութ)

Թուրքիայի  առաջատար երաժշտական հեռուստաալիքները եւ TRT-ն հայերենով տեսահոլովակ են հեռարձակել:

Բանաստեղծ Հովհաննես Շիրազի «Նամակ» ստեղծագործության հիման վրա տեսահոլովակը նկարահանվել է ամիսներ առաջ` Թուրքիայի ամենահայտնի պրոդյուսերներից մեկի` Օզքան Աքսուլարի կողմից, իսկ երաժշտությունը գործիքավորել է ստամբուլահայ հայտնի կոմպոզիտոր Մաժակ Թոշիկյանը։ Երգը կատարել է ստամբուլահայ երգչուհի Սիբիլ Փեքթորոսօղլուն, որը նախկինում երգել է «Սուրբ Վարդանանց» երգչախմբում:

Նախորդ տարի նոյեմբերին լույս էր տեսել երգչուհու «Սիբիլ» ալբոմը, որում ընդգրկված էին նաեւ «Տեր ողորմեա» եւ «Կիլիկիա» երգերը, իսկ ալբոմի առաջին երգը «Նամակ»-ն էր:

Սիբիլ Փեքթորոսօղլուն մասնագիտությամբ տնտեսագետ է, աշխատում է Ստամբուլի բանկերից մեկում, սակայն թուրք հասարակությանը նա հայտնի է որպես երիտասարդ երգչուհի: