Խաղաղ համաձայնագիր մշակելու ժամանակն է

Արդեն ժամանակն է, որ հաստատվեն Ղարաբաղյան հակամարտության կարգավորման հիմնարար սկզբունքները եւ սկսվեն խաղաղ համաձայնագրի մշակման աշխատանքները. այդ մասին երեկ հայտարարել է ԱՄՆ պետքարտուղարի տեղակալ Ֆիլիպ Գորդոնը` ելույթ ունենալով Սենատի արտաքին հարաբերությունների հանձնաժողովի եվրոպական հարցերով ենթահանձնաժողովում. տեղեկացնում է ԱՄՆ Սենատի կայքը:

Նրա խոսքերով` ԱՄՆ-ի, Եվրամիության եւ այլ միջազգային գործընկերների համատեղ ջանքերը Կովկասում առաջընթաց է ապահովվել: «Սակայն տարածքային վեճերը դեռեւս լուրջ խոչընդոտներ են կայունության համար»,- նշել է Գորդոնը:

Ըստ նրա` ԱՄՆ-ը մեծացնելու է համագործակցությունը ԵԱՀԿ Մինսկի խմբի հետ, որպեսզի օգնի Ադրբեջանին եւ Հայաստանին խաղաղ ճանապարհով լուծել հակամարտությունը:

Գորդոնը նաեւ ընդգծել է, որ ԱՄՆ-ը շարունակելու է աջակցել հայ-թուրքական հարաբերությունների բնականոնացման գործընթացին: