Հանրային լսումներ միջուկային նոր էներգաբլոկի վերաբերյալ

Հայաստանի էներգետիկայի եւ բնական պաշարների նախարարության, բնապահպանության նախարարության, Արմավիրի մարզպետարանի եւ «Մեծամորէներգատոմ» ՓԲԸ-ի համատեղ նախաձեռնությամբ` այսօր Արմավիրի մարզպետարանում տեղի են ունեցել միջուկային նոր էներգաբլոկի կառուցման վերաբերյալ երկրորդ հանրային լսումները:

ՀՀ էներգետիկայի եւ բնական պաշարների փոխնախարար Արեգ Գալստյանը, ներկայացնելով ծրագրի մանրամասները, նշել է, որ նոր միջուկային էներգաբլոկի աշխատանքները նախատեսվում է իրականացնել շրջակա միջավայրի վրա նվազագույն ազդեցությամբ: Նա նաեւ շեշտել է, որ նախագիծը բացառում է Ճապոնիայում տեղի ունեցած երկրաշարժի եւ ցունամիի հետեւանքով ատոմակայանում ծագած խնդիրներից շատերը: Ըստ փոխնախարարի` Հայաստանի նոր միջուկային էներգաբլոկի նախագծում հաշվի են առնվել միջազգային  հանրության կողմից միջուկային իրադարձությունների ուսումնասիրությունների արդյունքում յուրացված դասերը: