Կարսի հուշարձանի վերին հատվածներն արդեն չկան

Մոտ տասնհինգ օր առաջ սկսեցին քանդել Կարսի «Մարդկության հուշարձանը», որը նվիրված է հայ-թուրքական հարաբերությունների բարելավմանը: Այս պահին էլ ապամոնտաժման աշխատանքները շարունակվում են, եւ արդեն հեռացվել են հուշարձանի վերին հատվածները:

Աշխատանքներն իրականացվում է «Ավշին» շինարարական ընկերության կողմից: Նախապես մրցույթ է հայտարարված եղել, որն էլ շահել է այս ընկերությունը: Դրա ներկայացուցիչ եւ ապամոնտաժման աշխատանքների պատասխանատու Ռեյս Քարաքոչը մեզ հետ զրույցում ասաց, թե փորձում են հնարավորինս զգույշ աշխատել եւ հեռացված բեկորներն անվնաս հանձնել քաղաքապետարանին:

Նշենք, որ հուշարձանի ապամոնտաժելուն հատկացվել է 200 հազար դոլար, եւ այն իրականացվում է Թուրքիայի վարչապետ Էրդողանի հրամանով. նա իր այցելության ժամանակ այն տգեղ ու հրեշավոր էր բնութագրել: 

Աստղիկ ԿԱՐԱՊԵՏՅԱՆ

Կարս