Հերթը հասավ Համո Սահյանի բնաշխարհին

Սյունիքի մարզի Շենաթաղ գյուղում արդեն երրորդ տարին է` «Թի Էս Էս Սի Արմենիա» ՍՊԸ-ն ուսումնասիրություններ է իրականացնում ոսկու եւ բազմամետաղային հանքավայր հայտնաբերելու ուղղությամբ:

Ինչպես մեր թղթակցին հայտնեց Շենաթաղի համայնքապետ Երջանիկ Մուսայելյանը, ավագանու որոշմամբ ընկերությանը հանձնել են 2300 հա հողատարածք: Ուսումնասիրություններն ավարտվելու են 2012 թ. հոկտեմբերին:

«Այդ տարածքի միայն 1600 հեկտարն է համարվում գյուղնշանակության, եւ յուրաքանչյուր մեկ հեկտարի դիմաց համայնքի բյուջե մուտք է արվում 5000 դրամ»,- ասաց Ե. Մուսայելյանը եւ հավելեց, որ թեեւ տարածքը տվել են վարձակալության, սակայն, ըստ պայմանագրի, այն պետք է օգտագործվի նաեւ որպես խոտհարք ու արոտավայր:

Խոսակցություններ են շրջանառվում, թե հանքավայրի տերերը հնդիկներ են, որոնք նախատեսում են ոչ միայն շահագործել հանքավայրը, այլ նաեւ հենց տեղում ոսկու կորզման գործարան կառուցել, որն էլ, իր հերթին, կունենա պոչամբար:

Շենաթաղի համայնքապետը նույնպես հաստատեց այդ լուրը, սակայն հավելեց, որ ամեն ինչ պարզ կդառնա միայն ուսումնասիրություններից հետո: Նա համոզված է, որ հանքավայրի շահագործման դեպքում այնտեղ կաշխատեն 300-400 հոգի ինչպես Շենաթաղից, այնպես էլ Լորից, Գետաթաղից եւ Դարաբասից: