Ջիգարխանյանը Պուտինի հետ չհանդիպեց. վիրավորված է

Երեկ Պենզայում կայացել է ՌԴ վարչապետ Վլադիմիր Պուտինի հանդիպումը մշակույթի գործիչների հետ: Այդ հանդիպմանը հրավիրված է եղել նաև Արմեն Ջիգարխանյանը: Սակայն երբ դերասանը մոտեցել է ինքնաթիռին, որով հրավիրյալները պիտի մեկնեին, նրան թույլ չեն տվել մտնել օդանավ` պատճառաբանելով, թե Ջիգարխանյանի անունը ցուցակում չկա: Մոտ 20 րոպե դերասանը վիճաբանել է կազմակերպիչների հետ:

«Սա նվաստացուցիչ է»,- բողոքել է Ջիգարխանյանը: Իսկ երբ հանկարծ պարզվել է, որ թյուրիմացություն է եղել, Ջիգարխանյանը կտրականապես հրաժարվել է մտնել ինքնաթիռ` ասելով, որ իրեն վիրավորված է զգում:

«Եթե երբևէ ինձ նորից հրավիրեն, այլևս չեմ գնա: Հանկարծ կպարզվի, որ իմ անունը դարձյալ ցուցակում չկա»,- հայտարարել է Ջիգարխանյանը: