Սիրիան վերացնում է 1963 թվականից գործող ռեժիմը

Սիրիայի նոր կառավարությունը հավանություն է տվել երկրում 48 տարի գործող արտակարգ իրադրության ռեժիմը չեղյալ համարող օրինագծին: Արաբական ԶԼՄ-ների տեղեկություններով` նաեւ վերացվում է պետանվտանգության բարձրագույն դատարանը:

Օրինագիծը պետք է հաստատի երկրի նախագահ Բաշար ալ Ասադը, սակայն, փորձագետների կարծիքով` դա ընդամենը ձեւական բնույթ է կրելու:

Արտակարգ իրադրության վերացումը եւ այլ բարեփոխումները, նաեւ աշխատավարձերի ու կենսաթոշակների ավելացումը պատասխանն են երկրում շարունակվող բողոքի ակցիաների:

Նշենք, որ արտակարգ իրադրության պայմաններում գործող օրենքները երկրի անվտանգության ուժերին օժտում են անսահմանափակ լիազորություններով, ինչն էլ ժողովրդի դժգոհության հիմնական պատճառներից մեկն է: Ըստ 1963 թվականին մտցված արտակարգ իրադրության ռեժիմի` արգելվում են զանգվածային հավաքները, սահմանափակվում է քաղաքացիների անցուդարձը, անվտանգության ուժերին թույլ է տրվում ստուգել մարդկանց անձնական կապերը, ձերբակալել նրանց հարցաքննության համար, գրաքննել մամուլը:

Երկրի նոր կառավարությունը ձեւավորվել է ապրիլի 14-ին: Նույն օրն էլ նախագահ Ասադի հրամանով բանտերից ազատ են արձակվել բողոքի ակցիաների ժամանակ ձերբակալվածները: