Հայերը` ԱՄՆ-ի քաղաքականության եւ տրամաբանության արանքում

Թուրքագետ Հակոբ Չաքրյանի կարծիքով` այս տարի, ըստ տրամաբանության, ԱՄՆ նախագահ Օբաման պետք է արտասանի «ցեղասպանություն» բառը, իսկ, ըստ քաղաքականության, ոչ:

«Այսօր կարող ենք վստահաբար ասել, որ Թուրքիան հայ-թուրքական արձանագրությունները ստորագրել է Հայոց ցեղասպանության միջազգային ճանաչման գործընթացը կասեցնելու նպատակով: Իսկ ԱՄՆ-ը... Եթե Օբաման ասի «ցեղասպանություն» բառը եւ դրան չհետեւի հաջորդ քայլը, ապա այն անիմաստ կլինի»,- ասաց թուրքագետը:

Իսկ քաղաքագետ Լեւոն Շիրինյանը նշեց, որ խորհրդանշական է, որ ապրիլի 24-ին Օբաման լինելու է Լոս Անջելեսում:

«Մենք նոր առաջարկություններ պետք է անենք եւ նոր քայլերով հանդես գանք: Ճանաչման գործընթացում մեր ուժերը փոշիացել են, որովհետեւ չկա կենտրոնական մի մարմին, որը կկոորդինացնի այդ գործընթացը: Ժամանակն է, որ հայկական կողմը Հայաստանից դուրս ունենա լիազորված մի մարմին»,- նշեց քաղաքագետը:

Նրա համոզմամբ` լեգիտիմ այդ մարմինը պետք է ունենա Սփյուռքի բոլոր գաղթօջախների լիազորագիրը եւ գործի ամբողջ հայ ժողովրդի անունից: