Թուրքիան` ցայտնոտի մեջ

Թուրքական «Հայկական անհիմն պահանջների դեմ պայքարի հասարակություն» կազմակերպությունը (ASİMDER) պահանջում է Իրանի իշխանություններից արգելել ապրիլի 24-ին Թեհրանում Հայոց ցեղասպանության մասին ֆիլմի ցուցադրությունը:

ASİMDER ղեկավար Հեքսալ Գյուլբեյի խոսքերով` կազմակերպությունն այդ պահանջով նամակ է ուղարկել Էրզրումում Իրանի գլխավոր հյուպատոսարան:

«Մենք պահանջում ենք, որպեսզի «Ցեղասպանության լուսանկարիչը» ֆիլմը չցուցադրվի Թեհրանում: Չի կարելի թույլ տալ, որ այդ ցուցադրությունը վնասի թուրք-իրանական հարաբերություններին»,- ասվում է նամակում:

Ապրիլի 24-ին Թեհրանում ցուցադրվելու է հայ կինոռեժիսոր Տիգրան Խզմալյանի «Արմին Վեգներ. Ցեղասպանության լուսանկարիչը» փաստագրական ֆիլմը: Ցուցադրությանը ներկա են գտնվելու Իրանի խորհրդարանականներ: Կինոժապավենը նաեւ ցուցադրվելու է իրանական հեռուստաալիքներից մեկով: