Ֆուկուսիման հավասարեցվում է Չեռնոբիլին

Այսօր «Ֆուկուսիմա-1» եւ «Ֆուկուսիմա-2» ճապոնական ատոմակայանների անձնակազմերը անհապաղ տարհանման հրաման են ստացել: Պատճառը երկրի հյուսիս-արեւելքում դարձյալ գրանցված 6,3 մագնիտուդով ուժեղ երկրաշարժն է:

Սակայն, ըստ ատոմակայանների մասնագետների, դրանք նոր ցնցումից չեն վնասվել:

Ի դեպ, «Ֆուկուսիմա-1»-ից ռադիոակտիվ նյութերի արտահոսքը կարող է գերազանցել 1986 թվականին Չեռնոբիլում գրանցված քանակը. այսօր հայտարարել է վթարված ատոմակայանի օպերատոր` «Տոկիո էլեկտրիկ փաուեր» ընկերության ներկայացուցիչը:

Նրա խոսքերով` ռադիոակտիվ նյութերի արտահոսքը դեռ ամբողջությամբ չի կանգնեցվել: Այսօր երկրի կառավարությունը որոշել է ատոմակայանի վթարայնությունը 5-ից բարձրացնել առավելագույն` 7 մակարդակի: Ավելի վաղ այդ մակարդակի վթարայնություն ստացել էր միայն Չեռնոբիլի ատոմակայանը:

Սակայն Ճապոնիայի ատոմային եւ արդյունաբերական անվտանգության գործակալությունը վստահեցնում է, որ իրավիճակը «Ֆուկուսիմա-1»-ում սկզբունքորեն տարբերվում է չեռոբիլյանից: Նրանց տվյալներով` ռադիակտիվ նյութերի արտահոսքը ներկայումս չի գերազանցում Չեռնոբիլում գրանցվածի 10 տոկոսը: