Սյուժե սերիալների սիրահարների համար

Երկու օր առաջ «Կոնվերս բանկի» մասնաճյուղում տեղի ունեցած ավազակային հարձակումը կարող է հրաշալի թեմա դառնալ սերիալների սցենարիստների համար:

Բանն այն է, որ երբ բանկի հերթապահ ոստիկանը կրակոցով վիրավորել եւ վնասազերծել է դիմակավորված հանցագործին, անմիջապես բջջային հեռախոսով զանգահարել է շեֆին` իրավիճակը զեկուցելու:

Զանգը հնչել է տեղում, ոչ ավել ոչ պակաս` գետնին տապալված հանցագործի գրպանում: Սակայն խայտառակ իրարանցման մեջ հայտնված հերթապահ ոստիկանը չէր կարող պատկերացնել, որ գետնին տապալված հանցագործը հենց իր անմիջական շեֆն է` ոստիկանության Նոր Նորքի բաժնին կից պահպանության բաժնի պետ, ոստիկանության կապիտան Արթուր Հակոբյանը, ում համառորեն զանգահարում էր հերթապահ ոստիկանը: