Եմենի նախագահը խոստացել է հրաժարվել իշխանությունից

Այսօր Եմենի նախագահ Ալի Աբդալլահ Սալեհը մայրաքաղաք Սանայում ելույթ է ունեցել իր կողմնակիցների հանրահավաքում:

Նա հայտարարել է, որ պատրաստ է հրաժարվել իշխանությունից` արյունահեղությունից խուսափելու համար, սակայն մի պայման է առաջադրել` իշխանությունը հանձնելու է «միայն վստահելի մարդու, այլ ոչ թե հիվանդ, նեղացած կամ կոռումպացված»:

Սալեհը նաեւ մեղադրել է երկրի հյուսիսում գործող շիա ապստամբներին, հարավի անջատողականներին եւ «Ալ Քաիդա»-ին երկրի սահմանադրական կարգը խախտելու մեջ: Իսկ իր ընդդիմախոսներին խոստացել է, որ դիմադրելու է մինչեւ վերջ:

Միեւնույն ժամանակ Սալեհի տասնյակ հազարավոր հակառակորդներ բողոքի ցույց են կազմակերպել քաղաքի այլ մասերում: Բազմաթիվ ընդդիմադիրների անգամ թույլ չեն տվել մտնել Սանա. քաղաքի սահմաններին կանգնած են եղել զինվորական պահակակետեր: