GeoProMining Gold-ը հասավ իր ուզածին

Արդեն մի քանի օր է` GeoProMining Gold ընկերությունը սկսել է Սոտքի հանքավայրի ոսկու հանքանյութի մանրացման համար ջարդող եւ մանրացնող սարքի տեղադրման աշխատանքները. տեղեկացնում է «Էկոլուրը»:

Գյուղի բնակիչներն անհանգիստ են. «Ինչպես դա կարող է անդրադառնալ մեզ վրա, մենք չգիտենք: Մեզ ոչ ոք ոչինչ չի բացատրել»:

Ի դեպ, սարքի տեղադրման նախագիծը չի ներկայացվել ՀՀ բնապահպանության նախարարության բնապահպանական փորձաքննությանը:

Հանքանյութի մանրացումը վերամշակման գործընթացի նախնական փուլն է եւ Սեւանի ավազանում արգելվում է` «Սեւանա լճի մասին» ՀՀ օրենքի 10-րդ հոդվածով: Հաշվի առնելով այն, որ ամեն ամիս ընկերությունն արդյունահանում է թունավորության առաջին դասի եւ ռադիոակտիվ տարրեր պարունակող 60-70 հազար տոննա հանքանյութ, կարելի է ասել, որ Սոտքի բնակիչների անհանգստությունը հիմքեր ունի:

Զարմանալի է, որ ՀՀ բնապահպանության նախարարությունը, «Սեւան» ազգային պարկը, բնապահպանական պետական տեսչությունն անհանգստության նշաններ անգամ չեն ցուցադրում: