ԱԶԳ. Ասացինք` ոչ, էլի, yok

Հերթական անգամ թուրքական մամուլի միջոցով թերեւս առավել վերեւ կանգնած օղակներ փորձում են հող շոշափել հայ-թուրքական գործընթացի հնարավոր զարգացումների ու կենդանության ձեւերի առնչությամբ:

Այս անգամ էլ թուրքական մամուլը բարձրաձայնում է, թե հաջորդ ամիս հնարավոր է հայ եւ թուրք դիվանագետների հանդիպում` Ռուսաստանի միջնորդությամբ, Մոսկվայում:

Չնայած ամենաբարձր մակարդակով Թուրքիայում արվող հայտարարություններին, թե «լուռ» ու չգիտես էլ ինչ կարգի դիվանագիտություն է իրականացվում, հայկական կողմը քանիցս ընդգծել է, որ Հայաստանի նախագահի` հայ-թուրքական հարաբերությունների նորմալացման գործընթացի սառեցման մասին հայտարարությունից հետո որեւէ հանդիպում ու քննարկում տեղի չի ունեցել:

«Հայ-թուրքական հարաբերությունների կարգավորման համար նոր բանակցությունների կարիք չկա` անկախ ձեւաչափից: Կան ստորագրված արձանագրություններ, որոնք պետք է վավերացնել եւ իրականացնել առանց նախապայմանների: Սա է միջազգային հանրության եւ Հայաստանի դիրքորոշումը»,- մեկնաբանելով Ռուսաստանի միջնորդությամբ հայ-թուրքական բանակցությունների մասին լուրերը` այսպես է արձագանքել Հայաստանի ԱԳՆ խոսնակ Տիգրան Բալայանը: