Ահաբեկչության սպառնալիքի պատճառով

Ահաբեկչության սպառնալիքի պատճառով երեկ Թուրքիայում եւ Ադրբեջանում փակվել է իսրայելական 4 ներկայացուցչություն, այդ թվում` դեսպանությունները Անկարայում եւ Բաքվում. տեղեկացնում է իսրայելական «Հաարեց» թերթը:

Անցած երեքշաբթի օրը Իսրայելի ԱԳՆ ներկայացուցիչները տեղեկացրել էին երկրի ներկայացուցչությունների մոտակայքում տեղի ունեցած մի շարք կասկածելի իրադարձությունների մասին եւ ենթադրել, որ ահաբեկչություններ են կազմակերպվում: Այդ պատճառով էլ որոշվել է համապատասխան միջոցառումներ ձեռնարկել:

Ենթադրվում է, որ կազմակերպվող ահաբեկչությունների հետեւում կանգնած է «Հըզբոլլահը»:

Խնդրով զբաղվում են ազգային անվտանգության եւ հետախուզության աշխատակիցները: Իսկ մինչ այդ ԱԳՆ-ն որոշել է որոշ երկրներում ժամանակավորապես փակել երկրի դեսպանություններն ու հյուպատոսությունները: