Քվեն ուժ է

Վաղը` ժամը 17.00-ին, «Մոսկվա» կինոթատրոնում տեղի կունենա ՀՅԴ-ի նախաձեռնած Ընտրական իրավունքի պաշտպանության հասարակական շարժման անդրանիկ հավաքը, որի նպատակն է ընտրական իրավունքի միջոցով հասնել ժողովրդի իշխանության հաստատմանը:

Շարժման հիմնական խնդիրներն են` հասարակական գիտակցության մեջ ամրապնդել ժողովրդի իշխանության հաստատման գործում ընտրական իրավունքի առանձնահատուկ նշանակությունը, իրականացնել ընտրական իրավունքի արդյունավետ պաշտպանություն, ապահովել ընտրական իրավունքի լիարժեք իրացում:

Ըստ շարժման նախաձեռնողների` ընտրակաշառքի, վարչական լծակների օգտագործման, ընտրողներին պասիվության մղելու և այլ միջոցներով ընտրական իրավունքի նկատմամբ ոտնձգությունների դեմ համակարգված պայքարը հրամայական անհրաժեշտություն է:

Ընտրական իրավունքի ամբողջական իրացման համար պահանջվում են իրավական, քաղաքական և կազմակերպական բնույթի համալիր գործողություններ, որոնք բաժանվում են երեք հիմնական փուլերի` մինչև ընտրությունները, ընտրությունների օրը և հետընտրական ժամանակահատվածը:

Սրան զուգընթաց կձևավորվի իշխանության վերարտադրման արատավոր համակարգը վերացնելու անհրաժեշտ և բավարար միջավայր: