Որոշել են բարելավել սահմանի հատման խնդիրները

Հայ-վրացական սահմանը հատելիս խնդիրներ են ի հայտ գալիս. Վրաստանի կառավարության ղեկավարի հետ համատեղ մամուլի ասուլիսում, պատասխանելով վրացի լրագրողի հարցին, նշեց ՀՀ վարչապետ Տիգրան Սարգսյանը:

Դրանցից մեկն այն է, որ 2011-ի հունվարի 1-ից Հայաստանում ներդրվեց ավտոմեքենաների պարտադիր ապահովագրության համակարգը, ինչը նշանակում է, որ վրացական ավտոմեքենաները սահմանը հատելիս պարտավոր են ձեռք բերել ապահովագրական պոլիս` հենց սահմանի վրա:

Ինչ վերաբերում է Վրաստանին, ապա Տ. Սարգսյանի խոսքով, վրացական կողմը հունվարի 1-ից ուժի մեջ է դրել նոր օրենսդրություն, ըստ որի` ճանապարհների պահպանման համար բեռներով լի բեռնատար մեքենաները պետք է իրականացնեն վճարումներ:

Տ. Սարգսյանը նաեւ տեղեկացրել է, որ Վրաստանի վարչապետի հետ պայմանավորվել են այս գործառույթներն այնպես կազմակերպել, որ մեր տնտեսվարողներին եւ քաղաքացիներին պատճառվող անհարմարությունները հասցվեն նվազագույնի:

Երկու երկրների կառավարությունների ղեկավարները նաեւ պայմանավորվել են երկկողմանի պահպանել ֆինանսական ծախսատարության համամասնությունը եւ երկու երկրների ֆինանսների նախարարներին հանձնարարականներ են տվել` միասին աշխատելու եւ առաջարկություններ ներկայացնելու: