Դժգոհությունները տե՞ղ են հասել

ԼՂՀ կառավարությանն առընթեր արտադրական ենթակառուցվածքների վարչության պետ Կառլեն Պետրոսյանի` օրերս կայացած ասուլիսի ժամանակ քաղաքային տրանսպորտի թերությունների եւ ոլորտի նկատմամբ թույլ վերահսկողության վերաբերյալ բարձրացված հարցերը չեն անտեսվել:

Ասուլիսից հետո վարչության պետը «գործի է անցել»: Վերջին երկու օրում նկատելի բարելավվել է որոշ երթուղիների աշխատանքը:

Նման բարելավումներ Ստեփանակերտում լինում են, բայց միայն այն ժամանակ, երբ վերահսկողությունն է ուժեղացվում կամ համապատասխան ստուգումներ են սկսվում:

Վերահսկողության ուժեղացմանը զուգահեռ շարունակվում է երթուղայինների պարկի թարմացումը. այս ամսվա երկրորդ կեսին պարկը կհամալրվի նոր ավտոբուսներով, որոնք կփոխարինեն Ստեփանակերտի որոշ երթուղիներ սպասարկող հին երթուղայիններին:

Ապրիլից նոր ավտոբուսներով է նախատեսվում սպասարկել նաեւ Ստեփանակերտ-Երեւան-Ստեփանակերտ երթուղին. ծրագրի շրջանակներում ձեռք կբերվեն 25-տեղանոց 5 հարմարավետ ավտոբուսներ: