Բարեփոխված ԸՕ-ն կդրվի քննարկման

Ընտրական օրենսգրքի բարեփոխված տարբերակը  շուտով Ազգային ժողովում կդրվի քննարկման, կլինեն հասարակական լսումներ, ինչից հետո այն կուղարկվի Վենետիկի հանձնաժողովին` փորձաքննության համար: Այդ մասին այսօր լրագրողների հետ հանդիպման ժամանակ տեղեկացրեց ՀՀԿ խմբակցության պատգամավոր Հովհաննես Սահակյանը:

«Օրենսդրական փոփոխություններից բացի, շատ կարեւոր են նաեւ հասարակական, քաղաքական  կամքն ու  ընտրական մշակույթի ձեւավորումը, եւ այս առումով անելիք ունեն թե՜ իշխանությունը, թե՜ ընդդիմությունը»,- ասաց նա:

Հայաստանի քաղաքագետների միության նախագահ Հմայակ Հովհաննիսյանի կարծիքով` Ընտրական նոր օրենսգրքի  առաջին խնդիրը  ընտրությունների ինստիտուտի նկատմամբ վստահության վերականգնումը պիտի լինի:

«Ժառանգություն» խմբակցության պատգամավոր Արմեն Մարտիրոսյանն էլ կրկնեց, որ բարեփոխումների այս ծրագիրը պիտի լիներ իշխանության եւ ընդդիմության համատեղ աշխատանքը, իսկ նման քննարկումներ կազմակերպելով` իշխանությունները պարզապես նպատակ ունեն լեգիտիմացնել գործընթացը, արդյունքում` ընտրություններում էական փոփոխություններ չեն լինելու: «Մենք չենք ասում, որ միայն պետք է մեր եւ Դաշնակցության համատեղ առաջարկներն ընդունվեն, մենք ասում ենք, որ եթե ձեր առաջարկները քննարկվում են, ապա մերն էլ պետք է քննարկվեն»,- նշեց Արմեն Մարտիրոսյանը: