ՀԱՅԿԱԿԱՆ ԺԱՄԱՆԱԿ.Ամոթից դրդված

Բացօթյա առեւտրով իրենց ապրուստը վաստակող քաղաքացիները, ովքեր արդեն երկու շաբաթ է պարբերաբար բողոքի ակցիաներ են կազմակերպում, երեկ հասել են նախագահական նստավայր, որտեղ նրանց հսկել են կրկնակի ավելի թվով ոստիկաններ:

Սակայն երբ նախագահական նստավայր է ժամանել Հայաստանում ԱՄՆ դեսպան Մարի Յովանովիչը, ոստիկանների մի զգալի մասն այդտեղից ծլկել է, իսկ Երեւանի փոխոստիկանապետ Ռոբերտ Մելքոնյանը հրահանգել է նախագահականի դիմացից հեռացնել ոստիկանական ավտոմեքենաները, իբր` ամոթից դրդված: Այսինքն, Բազազը եւ մյուսները գիտեն, որ իրենց արածը, մեղմ ասած, ամոթ բան է, բայց դե եթե տարածքում դեսպան-մեսպան չկա, ոչինչ: Իսկ որ ՀՀ քաղաքացիներն են այդ խայտառակությանը ականատես, հոգ չէ: Ինչ վերաբերվում է Մարի Յովանովիչի` նախագահական այցելելու նպատակին, այն պաշտոնապես չի պարզաբանվել: ԱՄՆ դեսպանատնից լրագրողներին պատասխանել են, որ այցը ոչ պաշտոնական բնույթ է կրել: Սերժ Սարգսյանի մամուլի ծառայությունը եւս այդ այցի մասով լռություն է պահպանել: