Էլի՞ ԱՊՊԱ-ի մասին

Հունվարի 17-ի դրությամբ ապահովագրված է ՀՀ ավտոմեքենաների մոտ 65 տոկոսը, եւ եթե այսպես շարունակվի, ապա կստանանք գրեթե լիարժեք ծածկույթ` 80-85 տոկոս, որը առաջին տարվա համար միջազգային ասպարեզում համարվում է լավ չափանիշ:

Այսօր լրագրողների հետ հանդիպմանը հայտարարել է ՀՀ Կենտրոնական բանկի ֆինանսական համակարգի քաղաքականության եւ ֆինանսական կայունության վարչության պետ Վահե Վարդանյանը:

Ապահովագրական ընկերությունները հիշյալ ժամանակահատվածում ստացել են 1.200 զանգ, փոխհատուցման դիմում են ներկայացրել ավելի քան 350 անձ, որոնցից 120-ի գծով արդեն իսկ սկսվել է փոխհատուցման գործընթացը:

Ինչ վերաբերում է խնդրին, որ տեսուչները ուշանում են օրենքով սահմանված մաքսիմալ 45 րոպեից դեպքի վայրում լինել, ապա Հայաստանի ավտոապահովագրողների բյուրոյի տնօրեն Վահան Ավետիսյանի հավաստմամբ` 45 րոպե սպասելուց հետո վարորդն իրավունք ունի հեռանալ եւ համապատասխան փաստաթղթերով ներկայանալ ապահովագրական ընկերություն:

Կեղծ կտրոններ դեռեւս չեն հայտնաբերվել կամ էլ այնպիսի վարպետությամբ են կեղծված եղել, որ չեն տարանջատվել. կեղծարարը կտուգանվի 150.000 դրամով: