Բենզինը կրկին թանկացել է

Հայաստանյան շուկայում բենզինի գինը շարունակում է սահուն վերելքը։ Վերջին երկու օրվա ընթացքում միջին որակի (Premium) բենզինի լիտրը թանկացել է եւս 10 դրամով` հասնելով 410 դրամի։ Թանկացել են նաեւ բենզինի մյուս տեսակները։

Այս կերպ ավտովառելիքի հայաստանյան շուկան արձագանքում է միջազգային շուկաներում նավթի ու նավթամթերքների հարաճուն թանկացման միտումներին։ Brent տեսակի հում նավթի մեկ տակառի գինը միջազգային բորսաներում արդեն անցել է 95 դոլարից ու սրընթաց մոտենում է հոգեբանական 100 դոլարի սահմանագծին։

Այս հանգամանքը անհանգստացնում է ոչ միայն նավթ ներմուծող, այլեւ վաճառող երկրներին։ Միջազգային էներգետիկ գործակալության ավագ տնտեսագետ Ֆաթիհ Բիրոլը փաստել է. «Նավթի գները մտնում են գլոբալ տնտեսության համար վտանգավոր գոտի ու կասկածի տակ դնում հետճգնաժամային աշխուժացումը»£