Ուսանողական բողոքի ցույցեր` Իտալիայում

Հազարավոր ուսանողներ են հավաքվել Հռոմում` մասնակցելու կրթության համակարգում նախատեսվող բարեփոխումների դեմ կազմակերպված բողոքի ակցիաներին, հայտնում է BBC News-ը:

Ոստիկանությունն արդեն պաշտպանության տակ է առել երկրի խորհրդարանի մերձակայքը:

Բողոքի կազմակերպիչները հայտարարել են, որ ակցիաներ չեն լինելու քաղաքի կենտրոնում տեղակայված պետական հաստատությունների շրջակայքում` ոստիկանության հետ բախումներից խուսափելու համար:

Ուսանողների պատվիրակությունը մտադիր է հանդիպել երկրի նախագահ Ջորջո Նապոլիտանոյին եւ նրան հանձնել նախատեսվող բարեփոխումներում իրենց անհամաձայնությունն առաջացրած կետերի ցանկը:

Սպասվում է, որ այս շաբաթ Իտալիայի խորհրդարանի վերին պալատը` Սենատը, կհաստատի բարեփոխումը, ինչից հետո երկրի նախագահը կվավերացնի օրինագիծը: Կրթության նախարարությունում ասում են, թե սույն բարեփոխումը, որ, մասնավորապես, նախատեսում է ոչ մեծ համալսարանների միավորում, թույլ կտա միլիարդավոր եվրոներ տնտեսել:

Նախագծի քննադատները պնդում են, թե կրթության ծախսերի կրճատումն անթույլատրելի է, որովհետեւ Իտալիայում համալսարաններն առանց այդ էլ քիչ են ֆինանսավորում:

Ուսանողական ակցիաները մաս են կազմում ավելի մեծամասշտաբ բողոքների, որոնց պատճառը կառավարության` տնտեսման նպատակով ձեռնարկած միջոցառումներն են: Ուսանողական բողոքի սուր բնույթի պատճառներից մեկն էլ գործազրկության բարձր մակարդակն է երիտասարդության շրջանում: