Մոսկվայի հայկական կազմակերպությունների հայտարարությունը

Մոսկվայի հայկական կազմակերպությունների ֆորումը հայտարարություն է տարածել դեկտեմբերի 11-ին Մանեժնի հրապարակում, Մոսկվայի այլ շրջաններում, Դոնի Ռոստովում եւ այլ քաղաքներում տեղի ունեցած անկարգությունների կապակցությամբ:

Հայտարարությունում մասնավորապես ասված է. «Լինելով Ռուսաստանի քաղաքացիներ, Ռուսաստանի Դաշնությունում բնակվող կամ երկրում ժամանակավորապես գտնվող բոլոր անձանց պարտավորությունն ենք համարում օրենքի պահանջներին երթարկվելը:

Համոզված ենք, որ ազգային կամ կրոնական հիմքով կատարված բոլոր հանցագործությունները, առանց երկակի ստանդարտների, պետք է հետաքննվեն, բացահայտվեն եւ դատավարություն անցնեն:

Վերջին միջադեպի կապակցությամբ, իրավապահ մարմիններին, կոչ ենք անում` անցկացնել տեղի ունեցած սպանության մանրակրկիտ հետաքննություն, ինչպես նաեւ հրապարակել Մոսկվայի Մանեժնի հրապարակում տեղի ունեցած մասսայական անկարգությունների կազմակերպիչների եւ մեղավորների անունները, եւ օրենքի պահանջի սահմաններում խիստ պատժել նրանց»:

Հայտարարությունում նաեւ տեղ է գտել ռուսաստանյան սփյուռքին ուղղված` սադրանքներին չտրվելու եւ պետականության հիմքերը չխարխլելու կոչը: