ԼՂ հիմնահարցը պետք է լուծվի Հելսինկյան ակտի սկզբունքների և նախագահների մշակած կետերի հիման վրա

ԵԱՀԿ-ն պետք է շարունակի ջանքերը հակամարտությունների խաղաղ կարգավորման ուղղությամբ: ԵԱՀԿ գագաթնաժողովում ունեցած ելույթում այսօր հայտարարել է ԱՄՆ պետքարտուղար Հիլարի Քլինթոնը:

Ի թիվս այլ հակամարտությունների` ԱՄՆ պետքարտուղարն անդրադարձել է ԼՂ հիմնահարցին: «Որպես Մինսկի խմբի համանախագահ երկիր` նշում եմ, որ յուրաքանչյուր արդարացի լուծում պետք է հիմնված լինի Հելսինկյան ակտի սկզբունքների եւ նախագահներ Օբամայի, Սարկոզիի եւ Մեդվեդեւի` Աքվիլայում մշակած եւ Մուսկոկայում վերահաստատված վեց կետերի վրա: Ցանկանում եմ նշել, որ նշված սկզբունքներն ու կետերը միասնական ամբողջություն են, եւ դրանցից որոշների առանձնացումը եւ անտեսումը կխոչընդոտի խնդրի կարգավորմանը»,- ասել է Հիլարի Քլինթոնը: Իր խոսքում ԱՄՆ պետքարտուղարը հատուկ ընդգծել է, որ հակամարտությունները պետք է լուծվեն խաղաղ ճանապարհով, եւ ԵԱՀԿ-ն պետք է ավելացնի ջանքերը հակամարտություններն ու դրանց թեժացումը կանխելու համար: