close
Եղանակը Երևանում
29 Նոյեմբերի 2021
+16°
+27°Ցերեկ
+15°Գիշեր
weather
close
Փոխարժեք
29 Նմբ 2021
USD1486.54
GBP1613.24
EUR1550.71
RUB16.86
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

Մենք ամեն օր մտածում ենք այս իշխանությանը հեռացնելու մասին. Քրիստինե Վարդանյան

Հասարակություն

18 Հոկտեմբերի 2021, 22:06
 Մենք ամեն օր մտածում ենք այս իշխանությանը հեռացնելու մասին. Քրիստինե Վարդանյան

Հարցազրույց «Հայաստան» խմբակցության պատգամավոր Քրիստինե Վարդանյանի հետ

-Ձեր խմբակցության պատգամավորներից Արթուր Սարգսյանը, որը կալանքի տակ էր, օրերս ազատ արձակվեց, Ձեր կարծիքով՝ ինչի՞ արդյունքում դա հնարավոր դարձավ:

-Այո, նա մեր քաղբանտարկյալ գործընկերներից մեկն էր, որ անազատության մեջ էր և հիմա ազատ է արձակվել: Նա հաջորդ շաբաթ կմիանա մեր խորհրդարանական աշխատանքներին:

Այնպես չէ, որ այս ազատ արձակումն օդից ընկավ: Մենք ծրագրել ու իրականացրել ենք բոլոր քաղբանտարկյալ ընկերների պաշտպանությունը, ինչը պետք է անել նրանց՝ օր առաջ ազատվելու համար: Սա ընդդիմության վերջին ամիսների աշխատանքի նվազագույն արդյունքն էր:

Մեր հասցեին ուղղորդված մեղադրանքներ են հնչում, թե ընդդիմությունից կան քաղբանտարկյալներ, բայց նրանց ազատ արձակելու պահանջով ցույցեր չկան փողոցում: Ես ուզում եմ ասել, որ այս ընդդիմությունը տարբերվում է մյուսներից պատասխանատվության զգացումով ու նրանով, որ գործում է՝ առաջնորդվելով արդյունավետության չափորոշիչով: Ցուցադրելու համար ոչ մի բան պետք չէ անել:

Մեր միակ օրակարգը այսօր Հայաստանի անվտանգության հարցն է, և մենք իրավունք չունենք այդ օրակարգը շեղել, օրինակ, փողոցում ակցիա անելով:

-Ասացիք, որ ձեր միակ օրակարգը Հայաստանի անվտանգության հարցն է, այսինքն, վարչապետի հրաժարականի պահանջը առկախվո՞ւմ է:

-Ո՛չ, ո՛չ: Հայաստանում թիվ մեկ խնդիրը անվտանգության խնդիրն է: Այս իշխանությունը ոչ միայն չի կարող լուծել այդ խնդիրը, այլև ավելի է վտանգում իր գործողություններով, հետևաբար, այս իշխանության օր առաջ հեռացումը անվտանգության խնդիրները լուծելու առաջին քայլն է:

Մենք մեր օրակարգում որևէ փոփոխություն չունենք և չենք էլ կարող ունենալ, որովհետև ամեն անգամ իր գործողություններով իշխանությունը հաստատում է իրեն տրված բոլոր գնահատականները:

-Ընդդիմությունը մասնակցում է խորհրդարանի աշխատանքներին, հարցեր տալիս կառավարությանը, բայց հաճախ է հնչում հարցը, թե ինչո՞ւ ընդդիմադիրները Փաշինյանի աչքերին նայելով՝ չեն պահանջում նրա հրաժարականը:

-Ճիշտն ասած՝ դրա մասին անընդհատ խոսվում է: Եթե չեմ սխալվում՝ վերջին հարցուպատասխանի ժամանակ էլ Աննա Մկրտչյանը՝ «Պատիվ ունեմ» խմբակցությունից, խոսեց դրա մասին:

Մենք իշխանությունից պահանջում ենք անհապաղ հեռացում, և մեր պահանջը չի փոխվել: Իսկ հարցուպատասխանները փորձում ենք օգտագործել այս իշխանության իրականացրած ծրագրերի բուն նպատակը հնարավորինս պարզ ժողովրդին ցույց տալու համար:

Եվ, վերջապես, չեմ պատկերացնում, թե հարցուպատասխանի ժամանակ հրաժարականի պահանջ հնչեցնելը ինչպես կարող է օգնել ընդհանուր գործին:

-Ձեզ քննադատողները նկատի ունեն՝ արմատական վարքագիծ չեք դրսևորում:

-Այո, ճիշտ է, որ մարդիկ մեզ ձայն են տվել այս իշխանությանն օր առաջ հեռացնելու համար և հիմա պահանջում են կոնկրետ արդյունքներ: Այդ բոլոր մարդկանցից նեղանալ չի կարելի, և պետք է նրանց ցանկությունը ընդունել ի գիտություն:

Բոլորին պետք է կարողանանք բացատրել, որ ամեն օր աշխատում ենք այդ ուղղությամբ: Բայց մենք սխալվելու իրավունք այլևս չունենք, և պետք է մեր ամեն գործողություն լինի կշռադատված, ու ամեն հաջորդ գործողություն նախորդի հետ պետք է ունենա տրամաբանական կապ:

Ես դեմ եմ, որ ընդդիմությունն անի ցուցադրական, որևէ տեղ չտանող քայլ՝ պարզապես անելու համար: Զուտ ցույց տալու համար որ ինքը արմատական է: Ես ինքս ընդդիմությունից ոչ թե արմատական, այլ արդյունավետ քայլեր եմ պահանջում: Ընդդիմություն ասելով՝ նկատի ունեմ մեզանից: Ոչ թե արմատական կամ ոչ արմատական, ոչ թե կոպիտ կամ մեղմ, այլ՝ արդյունավետ քայլեր: Այստեղ է, որ մենք պետք է լինենք խելամիտ ու կշռադատված: Մեզ չեն ների այդ հարյուր հազարավոր մարդիկ, եթե մեր օրակարգը չիրականացնենք:

-Դուք ասացիք՝ էլ սխալվելու իրավունք չունենք: Հասկացե՞լ եք՝ որն էր ձեր սխալը:

-Մեզանից շատերն ասել են՝ մեզ չի հաջողվել իրականացնել իշխանափոխություն: Կրկնում եմ՝ մենք ունենք պատասխանատվության բարձր զգացում. մենք չենք կարող առաջնորդել մի գործընթաց ու պատասխանատու չլինել դրա համար: Մենք, իհարկե, հասկանում ենք, որ ունեցել ենք թերացումներ, սխալներ, որոնց հետևանքով նաև չի հաջողվել առայժմ իրականացնել իշխանափոխություն: Մենք մարդկանց հետ շատ անկեղծ ենք:

-Նախորդ շաբաթների ընթացքում ձեր խմբակցությունից հնչեցին հայտարարություններ՝ փողոցային պայքար սկսելու մտադրության մասին, բայց ձեր ուժին փողոցներում չենք տեսնում: Ո՞ր փուլում է գործընթացը:

-Նախ՝ էլի վերահաստատում եմ, որ մենք ամեն օր ոչ միայն մտածում, այլև աշխատում ենք այս իշխանությանը հեռացնելու ուղղությամբ: «Հայաստան» խմբակցությունում բոլորս մեզ համար արձանագրել ենք՝ այս ճգնաժամը խորհրդարանով չի հանգուցալուծվելու, հետևաբար, փողոցում պայքարը դառնալու այս իշխանության հեռացման գլխավոր հանգրվաններից մեկը:

Մենք մեր ընտրողներին, համակիրներին պետք է փոխանցենք, որ չկա մեկը մեր խմբակցությունում, որը կարծում է, թե այս ճգնաժամը հանգուցալուծվելու է խորհրդարանում: Լուծումը խորհրդարանից դուրս է, ու մենք արդեն աշխատում ենք դրա համար:

Մարդիկ պետք է հասկանան՝ այն փորձը, որի մասին մենք խոսում ենք, բավական մեծ նախապատրաստական աշխատանք է ենթադրում, բացատրական հանդիպումներ է ենթադրում: Մենք խնդիր ունենք արդյունավետ աշխատելու:

Այո, Հայաստանի Հանրապետությունում կան շուրջ 400 հազար քաղաքացիներ, որոնք մեզ հետ միասին կիսում են նույն գնահատականները, բայց կան նաև մեկ միլիոն քաղաքացիներ, որոնց գնահատականներն այլ են, և նրանք չեզոք են եղել այս գործընթացներում: Հենց նրանց դերակատարությունն է որոշիչ լինելու:

Մեզ ձայն տված շատ քաղաքացիներ բարկանում են, թե ինչու ենք ամիսներ շարունակ կրկնում նույնը: Ես նրանց կարող եմ պատասխանել՝ մենք խնդիր ունենք ևս մի քանի հարյուր հազար քաղաքացու բացատրել եղածը, հետո կատարվողը և հետո միայն՝ ինչ է մեզ սպասվում: Իրականությունը բացատրելու խնդիր ունենք, որ այդ մարդիկ գան, կանգնեն մեր կողքին, որ միասին փոխենք իրավիճակը:

-Ձեր խմբակցության որոշ անդամների մարզային այցելություններն այդ բացատրական աշխատանքների համատեքստո՞ւմ են:

-Այո, ես էլ իմ գործընկերների հետ այսօր եղել եմ Աբովյանում: Եվ երբ խոսում էի նախապատրաստական աշխատանքների մասին, հենց այդ այցերը նկատի ունեի:

Մենք սկսել ենք մեր ակտիվ հանդիպումները քաղաքացիների, մարզերի բնակչության հետ: Մարդիկ, մեր համակիրները պահանջում են կտրուկ գործողություններ և ասում են՝ այլևս սպասել հնարավոր չէ:

Մի էսպիսի տպավորություն կարող եմ փոխանցել՝ Հայաստանում անհրաժեշտ ազգային դիմադրության կորիզը ձևավորված է, ավելին՝ դիմադրության մթնոլորտը կա: Ընդդիմության գործն այս պարագայում անհրաժեշտ կերպով այդ գործը կազմակերպելն է: Դա հսկայական աշխատանք է, որը պետք է անենք պատվով: Եվ խնդիրը հենց դա է՝ իրավունք չունենք մսխելու այդ ռեսուրսը:

-Ազգային դիմադրության մասին հայտարարել էր ՀՅԴ ԳՄ ներկայացուցիչ Իշխան Սաղաթելյանը և կոչ էր արել միավորել արտախորհրդարանական ընդդիմադիր ուժերին: Այդ կոչին հետևող գործիչներ եղա՞ն, և, ընդհանրապես, կա՞ն արձագանքներ:

-Այո, դա հրապարակում էր համազգային դիմադրության մասին, և շատ կարևոր շեշտադրումով էր այդ հրապարակումը՝ ուղղված ընդդիմադիր դաշտում գործող մեր շատ գործընկերներին: Միմյանց հարվածելով ու միմյանցից դժգոհելով՝ դժվար թե կարողանանք դրական լուծումներ բերել օրակարգ: Միմյանց թիրախավորելը կարող է երկարաձգել իշխանության կյանքը:

Մեր բոլորի գործողությունները պետք է միտված լինեն այս իշխանությանը օր առաջ հեռացնելուն:

Իշխան Սաղաթելյանի կոչն ուղղված էր ընդդիմադիր դաշտում գործող բոլոր գործիչներին. եթե խորհրդարանական ընդդիմության գործելաոճը օբյեկտիվ և սուբյեկտիվ պատճառներով դժգոհություններ է առաջացնում, ապա իրենք ազատ են իրենց գործողություններն իրականացնելու, իրենց օրակարգն առաջ տանելու համար:

Աղբյուրը՝ Parliamentmonitoring.am

Երկրաշարժ Վրաստանում
28 Նոյեմբերի 2021, 12:35 Երկրաշարժ Վրաստանում

Այս բաժնի այլ նորությունները
Ամենաշատ ընթերցվածները
Yandex.Metrica