close
Եղանակը Երևանում
19 Սեպտեմբերի 2021
+16°
+27°Ցերեկ
+15°Գիշեր
weather
close
Փոխարժեք
19 Սեպ 2021
USD1486.54
GBP1613.24
EUR1550.71
RUB16.86
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

ՏԵՍԱՆՅՈՒԹ․ Ձիանո՞ց, թե՞ հէկ դենդրոպարկի փոխարեն․ իշխանությունը վերացնո՞ւմ է կանաչ տարածքները

Իրավունք

14 Սեպտեմբերի 2021, 19:00
 ՏԵՍԱՆՅՈՒԹ․ Ձիանո՞ց, թե՞ հէկ դենդրոպարկի փոխարեն․ իշխանությունը վերացնո՞ւմ է կանաչ տարածքները

Մեխակ Սայադյանին շրջակա միջավայրի նախարար Ռոմանոս Պետրոսյանի հրահանգով եւ Արգելոցապարկային համալիրի տնօրենի պաշտոնակատար Արա Հակոբյանի հրամանով ազատել են Իջեւանի դենդրոպարկի տնօրենի պաշտոնից։ Ռոմանոս Պետրոսյանը Սայադյանին անվստահություն է հայտնել եւ ազատել։ Մեխակ Սայադյանն ահազանգել է, որ Իջեւանի գինու գործարանը փոխում է Աղստեւ գետի հունը, ինչը բնապահպանական աղետի սպառնալիք է՝ գարնան վարարումները կքշեն դենդրոպարկի մի մասը, բացի դրանից՝ փոխված հունը նաեւ երաշտ կառաջացնի։ Սա իշխանություններին դուր չի եկել, Սայադյանին անվստահություն են հայտնել եւ ազատել աշխատանքից։

«Գետը կիսվել է։ Ես նախազգուշացրել, զգուշացրել եմ, խնդրել եմ՝ մի՛ արեք, դենդրոպարկին վնաս եք տալու։ Ինձ թերահավատորեն, երեւի նույնիսկ հեգնանքով նայեցին, թե էս գիտնականը, էս գիտաշխատողները զահլա են տանում։ Մարդիկ իրենց գործն արեցին, հիմա դեռ կիսատ է, շարունակում են։  Ես գրեցի իրենց, որ ունենալու ենք աղետ։ Եկեք այնպես անենք, որ երկու կողմն էլ խնդիր չունենա, խաթարվելու է մեր ջուրը»,-Yerkir.am-ի հետ հարցազրույցում ասաց Իջեւանի դենդրոպարկի նախկին տնօրեն Մեխակ Սայադյանը։

Նա ենթադրություններ ունի՝ այն, ինչ կառուցում են այդ հատվածում, փոքր հէկ-ի է նման։ Սայադյանն ասում է՝ գետի հունը փակել են, ինչը գարնանն առաջացնելու է վարարումներ, բայց այս հանգամանքներին ուշադրություն դարձնող չկա։ Դենդրոպարկը 1961 թվականին հիմնադրել է Մեխակ Սայադյանի հայրը չոր, քարքարոտ տարածքում, նրանից հետո գործը շարունակել է որդին ընտանիքի հետ․ այստեղ 4 դոկտորական եւ 8 թեկնածուական աշխատանք է պաշտպանվել։ Դենդրոպարկն ունի աշխարհում արջատխլենիների միակ ծառուղին, հազվադեպ հանդիպող բուսա եւ ծառատեսակներ։ Սայադյանի համար էլ է հարցական՝ ինչո՞ւ իր առջեւ «անվստահության» խնդիր դրեցին այն դեպքում, երբ նույնիսկ սեփական միջոցներն է ներդրել այգին կանաչ պահելու համար։

«Ես ասում եմ պարոն նախարար, պարոնայք, եկեք էս հարցը կարգավորենք, բայց իրենք հարմար գտան՝ ինձ հետ գնալ առճակատման, ինչ ասես ասել։ Վերջում էլ էսպիսի աբսուրդային հրաման։ Ո՛չ նկատողություն եմ ունեցել, ո՛չ դիտողություն։ Եթե մնաց էսպես, այգին վերանալու է։ Որոշ ծառեր չորացել էին, պետք  նորերը տնկեինք, կան կիսաչոր ծառեր։ Արդեն կես հեկտարից ավելի ջուրը լվացել տարել է։ Երբ Արծվիկ Մինասյանն էր բնապահպանության նախարարը, ինձ զանգեցին, հարցրին, որ էսպիսի բան են ուզում՝ փոխել գետի հունը, ես ասացի հետեւանքները, իրենք լսեցին, մերժեցին։ Արդեն 18 թվին են էդ բոլորը կազմակերպել, դա գիտեի, հետո էլ նախարարությունից իմացա, որ խոսակցություններ կան, որ դենդրոպարկը տրամադրվի գինու գործարանին՝ ձիու հետ կապված ինչ-որ բան կա՝ կա՛մ ձիարշավարան, կա՛մ ձիաբուծարան, չգիտեմ։ Իրենք ինձ հետ խոսելիս ձիու անուն չեն տվել»,-Yerkir.am-ին ասաց Մեխակ Սայադյանը։

Իջեւանի դենդրոպարկի նախկին տնօրենը դատի է տվել շրջակա միջավայրի նախարարությանը։ 

«Դատական պրոցեսը սկսում ենք, վաղը մենք մեր հայցադիմումը թողնելու ենք ու կսպասենք դատավարության օրվան»,-նշեց Մեխակ Սայադյանը։

Իջեւանի դենդրոպարկի նախկին տնօրենն ասում է՝ փոխած հունով գետը գլխներին պատուհաս է դառնալու, քանի որ հատկապես գարնանը, երբ վարարումներ սկսեն, տիղմի մեծ հոսք է լինելու։ Էկոլոգիական վտանգը, այնուամենայնիվ, պատկան մարմինների մտահոգությունը չի առաջացրել, հակառակը՝ մասնագետին ազատել են աշխատանքից։ Սայադյանի համար մինչեւ այսօր էլ հասկանալի չէ՝ ինչո՞ւ իր առջեւ դրեցին ազատվելու խնդիր։ Նրա խոսքով՝ այս տարածքի հետ կապված գիտակրթական ծրագրեր ունեին, ի վերջո տարեկան բազմաթիվ այցելուներ են գալիս եւ անվճար հիանում բացառիկ ծառատեսակներով այգուն։

«Սա մենք ուզում էինք դարձնել էկոլոգիական դաստիարակության կենտրոն։ Դրա վրա ինչ ասես ասացին։ Ի՞նչ ենք արել․ պահել ենք, մեզ ուրիշ ոչինչ պետք չի եղել։ Հարցն այն չէ՝ դատը ե՞ս կշահեմ, թե՞ չէ․ սա որ էսպես մնաց, վերանալու է, կործանվի»-Yerkir.am-ին ասաց դենդրոպարկի նախկին տնօրենը։

Նրա խոսքով՝ այսօր մասնագետներ էլ համարյա չկան, որոնք կկարողանան պատկան մարմիններին հասկացնել՝ ի՞նչ հետեւանքներ կարող է ունենալ Աղստեւի հունը փոխելը։

Մանրամասն՝ տեսանյութում


yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica