close
Եղանակը Երևանում
25 Հունիսի 2019
-2°
+3°Ցերեկ
-3°Գիշեր
weather
close
Փոխարժեք
25 Հնս 2019
USD1477.81
GBP1609.64
EUR1544.32
RUB17.60
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

Օպերայի թատրոնի կոլեկտիվը Ղարիբյանի` կառավարման խորհրդում լինելու մասով միանշանակ տեսակետ չունի

Մշակույթ

27 Մայիսի 2019, 16:35
 Օպերայի թատրոնի կոլեկտիվը Ղարիբյանի` կառավարման խորհրդում լինելու մասով միանշանակ տեսակետ չունի

Ալեքսանդր Սպենդիարյանի անվան օպերայի և բալետի ազգային ակադեմիական թատրոնի կոլեկտիվի մի մասը չի հասկանում` ինչպե՞ս ստացվեց, որ թատրոնի կառավարման խորհրդի նախագահի ընտրությունը հապշտապ կերպով կազմակերպվեց, և Նազենի Ղարիբյանն ընտրվեց այդ պաշտոնում:

Թատրոնի կոլեկտիվն այսօր լրագրողների ներկայությամբ քննարկում էր հրավիրել` հասկանալու քայլերի հաջորդականությունը, որը կստիպի Նազենի Ղարիբյանին` հրաժարական ներկայացնել:

Թատրոնի դիրիժոր Հարություն Արզումանյանը խոսքի սկզբում հավաստեց` նախկինում էլ Հասմիկ Պողոսյանի հետ են աշխատել, նա է եղել խորհրդի նախագահը: «Բայց այժմ, երբ կառավարությունը վերջնական ձևավորված չէ, անհասկանալի է` ինչու է արագացված կերպով, հապշտապ ընտրություն նշանակվել: Կառավարման խորհուրդն այն մարմինն է, որը թատրոնի տնօրենի հետ իրականացնում է թատրոնի ղեկավարումը, այսինքն` թատրոնի ներսում բարձրացված բոլոր հարցերը, խնդիրները կառավարության խորհրդի միջոցով են հասցվում կառավարություն: Եվ հիմա թատրոնի աշխատակիցները չեն պատկերացնում՝ ինչպե՞ս է Նազենի Ղարիբյանն աշխատելու այդ խորհրդում: Բոլորը գիտեն վարչապետին ուղղված` թատրոնների ղեկավարների նամակի մասին (ԹԳՄ-ն պահանջում էր մշակույթի նախարարի պարտականությունները կատարող Նազենի Ղարիբյանի հրաժարականը), հիմա նա ինչպե՞ս է պատրաստվում աշխատել օպերայի թատրոնի հետ»,- ասաց նա:

Արդարության համար նշենք, այդ նամակը գրելուց հետո արվեստագետները նշել էին, որ եթե իրենց պահանջը չկատարվի, բողոքի ակցիաներ կնախաձեռնեն: Պահանջը, իհարկե, մնաց թղթի վրա, իսկ դրա մասին մոռացան, երբ վարչապետը հայտարարեց, թե թատրոնում խախտումներ են եղել: Կարճ ասած` թատերական գործիչները «հանգիստ նստեցին տեղները»:

Քննարկման ժամանակ Արզումանյանը հայտնեց, որ կոլեկտիվը ներկայացնող երկու մարդ կողմ է քվեարկել Նազենի Ղարիբյանի թեկնածությանը:

Նշենք, որ կառավարման խորհուրդը կազմված է 8 հոգուց, որոնցից 2-ը օպերայի թատրոնի ներկայացուցիչներն են: Ղարիբյանի թեկնածությանը կողմ են քվեարկել Պերճ Քարազյանն ու Սերգեյ Սաֆարյանը:

Դիրիժորն ընդգծեց, որ իրենց ներկայացուցիչների քվեարկությունից որևէ բան չէր փոխվելու, քվեարկության արդյունքները նույնն էին մնալու:

«Թատրոնի խորհուրդը պետք է թատրոնի շահը դարձնի գերակա, ոչ թե փորձության ենթարկի թատրոնը»,- ասաց Սաֆարյանը:

Պերճ Քարազյանն էլ, որպես իր քվեարկության արդարացում, ասաց. «Իրենք քաջատեղյակ են թատրոնի խնդիրներից, իսկ Ղարիբյանը խորհրդի ամենաազդեցիկ մարդն է, ամենօրյա շփում ունի կառավարության հետ: Նա ներկայացնում է մշակույթը կառավարությունում ու մեր թատրոնի խնդիրներն արագ կարող է կառավարություն հասցել»: 

Քարազյանի ասածը բորբոքեց կրքերը: Վանկարկեցին` դուք ծախել եք Օրբելյանին:

Դիրիժոր Հարություն Արզումանյանն ասաց, թե Նազենի Ղարիբյանը Օրբելյանին կանչել ու ասել է, որ դիմում գրի, նա իրենց պետք չէ:

«Պե'րճ, մարդը եկել ու քանդում է մեր թատրոնը, դու հիմա մեզ ի՞նչ ես համոզում»,- տեղից բացականչեց թատրոնի մեկ այլ արտիստ:

Օպերայի թատրոնի երիտասարդական ծրագրի ղեկավար Լևոն Ջավադյանն էլ ընդգծեց` բայց օրենսդրությունը չի պարտադրում, որ խորհրդի նախագահն անպայման նախագահ լինի: «Առաջարկում եմ քվեարկել` ով է կողմ, ու ով` դեմ, որ Ղարիբյանը լինի խորհրդի նախագահ»,- հարցրեց նա:

Ներկաների մեծամասնությունը դեմ էր:

«Անթույլատրելի է, որ Նազենի Ղարիբյանը լինի խորհրդի նախագահ, նա չգիտի օպերայի եւ բալետի տարբերությունը, դա անհնար է եւ անթույլատրելի… Պահանջում ենք, որ ընդհանրապես ոլորտի հետ այդ կինը կապ չունենա»,- կոնցերտմայստեր Աշոտ Խոյեցյանն էլ վրդովմունքն այսպես արտահայտեց:

Թատրոնի կոլեկտիվը, արվետսագետին բնորոշ մթնոլորտը խախտելով, քննարկումը շարունակել չկարողացավ. իրար սկսեցին «արա»-ով դիմել, այնուհետև անցան «արան պապադ ա»-ին: Տեսնելով, որ քննարկում չի ծավալվում, որոշեցին ցրվել` ասելով, թե հետո հայտարարություն կտարածեն:

Լևոն Ջավադյանը նույնիսկ մեղադրեց լրագրողներին, որ նրանց ներկայությունը կաշկանդում է արտիստներին:

Մի խոսքով` այդպես էլ հստակ չէր` ինչ էին քննարկում ու ինչ վերջնարդյունքի եկան: Հստակ է  մի բան` օպերայի թատրոնի կոլեկտիվը Ղարիբյանի` կառավարման խորհրդում լինելու մասով միանշանակ տեսակետ չունի:

ի դեպ Ժողովին հրավիրվել էր նաև Նազենի Ղարիբյանը, բայց նա անտեսել էր կոլեկտիվին:

yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica