close
Եղանակը Երևանում
19 Հունիսի 2019
-2°
+3°Ցերեկ
-3°Գիշեր
weather
close
Փոխարժեք
19 Հնս 2019
USD1477.78
GBP1598.37
EUR1534.35
RUB17.43
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

Միֆեր մի՛ ստեղծեք , դավադիրներ մի՛ որոնեք, այս պետական տեռորին պետք է վերջ տալ. Ռուստամյան

Քաղաքական

24 Մայիսի 2019, 00:17
 Միֆեր մի՛ ստեղծեք , դավադիրներ մի՛ որոնեք, այս պետական տեռորին պետք է վերջ տալ. Ռուստամյան

Դաշնակցության նախաձեռնած հանրահավաքից հետո լրագրողների շուրջկալում էր հայտվել ՀՅԴ Բյուրոյի նախագահ Արմեն Ռուստամյանը: Նրանց հարցերի մեծամասնությունը ոչ թե բուն հանրահավաքին էին վերաբերում, այլ ՀՀ երկրորդ նախագահ Ռոբերտ Քոչարյանին ու նրա դատավարությանը:

Քոչարյանի խափանման միջոց կալանքը փոխելուց հետո Ռուստամյանը նրա հետ չի հանդիպել: «Միֆեր մի՛ ստեղծեք , դավադիրներ մի՛ որոնեք, այս պետական տեռորին պետք է վերջ տալ: Հերիք եղավ: Չեմ էլ հիշում, թե վերջին անգամ երբ եմ տեսել նրան»,- ասաց նա:

«Եթե պետական տեռոր է` ինչո՞ւ դատախազություն չեք ներկայացնում»,- հարցրեցին լրագրողները:

Ռուստամյանն էլ իր հերթին հարցրեց `իսկ թողնո՞ւմ են, որ դատախազությունն աշխատի, որ իրենք էլ բողոք ներկայացնեն: «Այսինքն` ո՞ւմ ներկայացնենք: Եթե դատարանները շրջափակում են, դատախազությանն ու մյուսներին ուղղորդելու այս պայմաններում ո՞ւմ դիմենք»,- ասաց նա:

Ինչ վերաբերում է երկրորդ նախագահի դատավարությանը, ապա, ըստ ՀՅԴ-ականի, որոշում կայացնողը դատարանն է: «Եթե դատավարությունը պետք է ժողովրդի քվեարկությամբ լինի, այդ ժամանակ բոլորը բոլորի դեմ են դուրս գալու: Դուք հասկանո՞ւմ եք` սա ինչ է նշանակում: Եթե ասում են` մարդ է սպանվել, որը եղել է այդ իշխանության օրոք, ուրեմն` իշխանությո՞ւնն է մեղավոր: Եթե այդպես է, ապա այսօր որևէ մարդասպան չպետք է դատվի, որովհետև սա Նիկոլ Փաշինյանի իշխանությունն է: Սա ի՞նչ աբսուրդ է: Ամեն մեկը կոնկրետ իր արարքի համար պետք է պատասխան տա: Սահմանադրական կարգի տապալումն էլ պետք է փաստվեր, մենք վաղուց էինք ասում դրա մասին: Դա մի աբսուրդ գործ է, որ տապալման է գնում: Տասը զոհերի մասին, թող խոսեն: Փաստեր կան, որ ուղղակի անտեսվում են: Հանցակազմը չապացուցված` արդյո՞ք սահմանադրական կարգի տապալման  հանցադեպ է եղել, հանցավոր են գտնում: Դրա համար  եմ ասում` տապալման է գնալու գործը: Եթե երկրում տեղի ունեցածի մեղավորը երկրի նախագահն  է, ուրեմն մարդասպանները կարող են ազատ մարդ սպանել,  մեկ է, վերջում բռնելու են երկրի նախագահին: Սա՞ է ճիշտ ձևը, ո՞ւր ենք գնում, նախնադա՞ր: Դուք համարում եք, որ սա արդարադատությո՞ւն է: Չենք ասում` արդար է կամ արդար չի, բայց դատեք օրինական ճանապարհով: Այն ժամանակ էլ ասել եմ, որ` եթե դուք այնպիսի մակարդակի մեղադրանք եք առաջադրելու,  ինչի տակ եք մնալու, ուրեմն պետք չի անել: Ու փոխանակ դատեք իրական բաների համար, արդարացնելու եք: Սահմանադրականության մասով չեն կարողանալու առաջ գնալ, դրա համար էլ փորձում են դատարաններն արգելափակել: Ի՞նչ արեցին, Քոչարյանի ջրաղացին ջուր լցրեցին: Հիմա Քոչարյանն ունի բոլոր իրավական հիմքերն` ասելու` քաղաքական հետապնդում է իրականացվում իր անձի հանդեպ»,- նշեց Ռուստամյանը` ավելացնելով. .Ամբողջ աշխարհի աչքի առաջ փակել են դատարանի դռները: Ու եթե ասում են` դա եղել է Քոչարյանի դատավարության հետևանքով, ապա նշանակում է ` Քոչարյանին արդարանալու շանս են տալիս»:

Նա վստահեցնում է` մեր ազգը քաղաքակիրթ է, ու պետք չէ մեզ քարե դար տանել, փողոցային դատավարությամբ զբաղվել:  Ըստ Ռուստամյանի` նույնը նաև Մանվել Գրիգորյանին ազատ արձակելու հարցն է: «Ազատ կարձակեն, թե` ոչ, որոշողը դատարանն է: Չեմ կարող ասել` այսպես կամ այնպես անեն, դա իմ գործը չէ, ու  ամեն մարդ թող իր գործով զբաղվի»,- ասաց նա:

Հարցին, թե հանրահավաքիններկա էին նաև այն մարդիկ, որոնք սատարում են Քոչարյանին, հետևաբար` հնարավո՞ր է, որ ՀՅԴ-ն նրա հետ միասնական ճակատով հանդես գա, Ռուստամյանը նախ պատասխանեց, որ հանրահավաքը բաց է, ու իրենք չեն ստուգում` ով է գալիս, ով` ոչ, դա մարդկանց իրավունքն է, ապա շարունակեց. «Թշնամիներ փնտրել պետք չէ, իսկ եթե կան այդպիսիք, պետք է բացահայտել, ոչ թե դրա մասին խոսել եթերում: Դա շատ ավելի վատ տեղ է տանում, նշանակում է բոլորիս բոլորի դեմ հանել: Դուք ինձ եք կասկածելու, ես` ձեզ, ու դրա լեգիտիմ իրավունքը մեզ տվել է պարոն վարչապետը` իր հայտարարությամբ: Չի կարելի դավադիրների մասին խոսել` չբացահայտելով, թե ովքեր են: Բացահայտեք, ինչո՞ւ եք հապաղում, չէ՞ որ եթե դավադիր են` կփախչեն: Ո՞ր մի դավաճանը կսպասի, որ գան, իրեն բռնեն: Նման հայտարարություն անում են նրանց բռնելուց հետո, ոչ թե ասում են` հայ-հարա՜յ, եկել եմ ձեզ բռնեմ: Սրա իմաստը ո՞րն է»:

Ռուստամյանն ասաց նաև, որ եթե Քոչարյանի նկատմամբ ամեն բան շարունակվի նույն ոճով, ապա, իհարկե, ստացվելու է, որ քաղաքական հետապնդում կա նրա հանդեպ: Բացատրեց` եթե դատարանի վճիռը դուր չի գալիս իշխանություններին, ու վարչապետի կոչով դատարան են արգելափակում, ապա էլ ինչպե՞ս է լինում հետապնդումը:

Լրագրողները հետաքրքրվեցին նաև` Արցախի նախկին ու ներկայիս նախագահների` Քոչարյանի խափանման միջոց  կալաքը փոխելու համար ներկայացված անձնական միջնորդությունը արդյո՞ք միջամտություն չէր Հայաստանի ներքին գործերին: Ռուստամյանը բացասական պատասխան տվեց ու շարունակեց.  «Փաշինյանն էլ է լավ բացատրել ու ասել, որ բարոյական առումով ամեն ինչ ընդունելի է: Նա էլ կարող էր միջնորդել գումար վճարել: Ես չեմ տեսնում, որ սենսացիա կարող է լինել այստեղ: Ամեն մարդ էլ ունի դրա իրավունքը: Եթե կոնկրետ ներքին գործ է, պետք չէ, որ որևէ մեկը խառնվի, բայց Հայաստանն  ու Արցախը ունեն նաև համահայկական հարցեր: Ես գանձի մասին եմ խոսում, դուք` տանձի: Ի՞նչ կապ ունի Ռոբերտ Քոչարյանը, այս ցավից ե՞րբ եք ազատվելու: Հարգելինե'րս, դո՛ւրս եկեք այս հիվանդ վիճակից, վերջացրե'ք, թողեք կառուցեն երկիրը: Մենք անգամ խնդիր ենք դնում, որ Հայաստանի խորհրդարանում ներկայացուցիչ ունենա Սփյուռքը, որովհետև կան համահայկական հարցեր, որոնց Սփյուռքը պետք է ունենա իր ուղղակի մասնակցությունը, բայց տեղ չենք տալիս այդ մարդկանց, որ կարողանան իրենց հարցերը ներկայացնել»:

Ռուստամյանը հավելեց նաև, որ մի կարճ ընթացք Փաշինյանի ղեկավարած կառավարությունում աշխատել են հենց նրա հրավերով: Հիշեցրեց` ժամանակին նաև  Տեր-Պետրոսյանն էր առաջարկել կառավարության մաս կազմել, 4 պորտֆել էր առաջարկել, բայց ուղղությունները չէին համընկել ու համաձայնության չէին եկել:

«Մեր խնդիրը ոչ թե ինքնանպատակ պորտֆելներ ունենալն է, այլ այն, ինչի մասին խոսում ենք: Այն ժամանակ, երբ Փաշինյանի հետ խոսել ենք, հինգ կետեր ենք քննարկել, դրանց շուրջ համաձայնել ենք ամբողջությամբ, համագործակցության ընթացքը եղել է համաձայնեցված: Մեր ջրերը բաժանվեցին հոկտեմբերի 2-ին, քանի որ չէին կարող պարտադրել` ինչպես քվեարկենք: ՀՅԴ –ի հետ ոչ ոք չի կարող այդ լեզվով խոսել: Ասել են` դուք կառավարության մեջ եք, ու եթե այլ կերպ քվեարկեք, կմտածեք ձեր հետագայի մասին: Մենք էլ ասել ենք` նախ` կառավարությունը և Ազգային ժողովն իրարից տարանջատված են, ապա` տարբեր կուսակցություններ ենք ու մեր գործունեությունը ծավալում ենք մեր ծրագրերին համապատասխան: Իսկ ի՞նչ պարզվեց այդ քվեարկությունից հետո` որ մենք ճիշտ էինք, իրենք` սխալ, օրենքն էլ` սահմանադրական»,- ամփոփեց Արմեն Ռուստամյանը:

 

 

 

Գլխավոր թշնամին
18 Հունիսի 2019, 20:17 Գլխավոր թշնամին
yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica