close
Եղանակը Երևանում
17 Նոյեմբերի 2018
+5°
+11°Ցերեկ
+5°Գիշեր
weather
close
Փոխարժեք
17 Նմբ 2018
USD1485.72
GBP1621.53
EUR1550.71
RUB17.35
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

Մենք միշտ ընդունել ենք խաղաղությունը, սակայն մենք չենք կարող խաղաղություն ստանալ` հողերի վերադարձի մասին խոսելով. Հարութ Շիրինյան

Հասարակություն

17 Հոկտեմբերի 2018, 17:51
 Մենք միշտ ընդունել ենք խաղաղությունը, սակայն մենք չենք կարող խաղաղություն ստանալ` հողերի վերադարձի մասին խոսելով. Հարութ Շիրինյան

Պարոն Միլսի հայտարարությունը խիստ դատապարտելի է, ավելին` քաղաքական կոպիտ սխալ է. Yerkir.am-ի հետ զրույցում ասաց ՀՅԴ Եվրոպայի Հայ Դատի հանձնախմբի հաղորդակցության և հանրության հետ կապերի պատասխանատու Հարութ Շիրինյանը` անդրադառնալով ՀՀ-ում ԱՄՆ դեսպան Ռիչարդ Միլսի «գրավյալ տարածները» վերադարձնելու մասին երեկվա հայտարարությանը:

«Պարոն Միլսի հայտարարության մեջ մի շարք անընդունելի և զարմանալի երևույթներ կան, որոնք ցանկանում եմ ընդգծել: Առաջինը նրա օգտագործած տերմինաբանությունն է: Նա խոսում է «գրավյալ տարածքների» մասին, մինչդեռ ԵԱՀԿ Մինսկի խմբի համանախագահ երկրների կողմից` համախոհությամբ, որևէ ժամանակ չի օգտագործվել այդ եզրույթը. «գրավյալ տարածքներ» արտահայտություն չկա, ինչպես նաև չկա որևէ խոսք դրանք վերադարձնելու մասին: Ասեմ ավելին` անգամ ԵԱՀԿ Մինսկի խմբի առաջարկած Մադրիդյան սկզբունքներում որևէ ժամանակ չի գրվել, այսպես կոչված,  «գրավյալ տարածքների» մասին»,- նշեց Շիրինյանը` հավելելով, որ Հայ Դատի հանձնախմբի կողմից քննադատված այդ փաստաթղթում խոսվում է Լեռնային Ղարաբաղի շուրջ գտնվող տարածքների մասին: «Տերմինաբանության հստակ խնդիր կա»,- պարզաբանեց Շիրինյանը:  

Անդրադառնալով Միլսի`  «ես զարմացած էի, երբ առաջին անգամ այստեղ եմ եկել եւ պարզել, որ ինձ հանդիպած հայերի մեծամասնությունը կտրականապես դեմ է եղել օկուպացված տարածքների վերադարձին» հայտարարությանը,  նա նշեց, որ իրականում ինքն է զարմացած դեսպանի զարմանքից: «Դեսպանը, գտնվելով Հայաստանում, դեռ զարմանում է նրանից, որ հայ ժողովուրդը համախմբված է այն մտքի շուրջ, որ մենք Ադրբեջանին վերադարձնելու տարածք չունենք: Ընդհակառակը` մենք դեռ տարածքներ ունենք հետ բերելու: Ես ամենաշատը զարմացած եմ այն բանից, որ դեսպանն իր զարմանքի մասին հայտնում է պաշտոնից հեռանալուց անմիջապես առաջ, ինչը, իմ կարծիքով,  ավելի հեշտ է»,- նշեց Շիրինյանը:  

Նա չբացառեց նաև այն հանգամանքը, որ Միլսի հայտարարությունը կարող է հետագայում խնդրահարույց լինել: «Կարող է խնդիր առաջացնել, որ ինքը կարծում էր` հայերը, մանավանդ` Արցախի ժողովուրդը պիտի ընդունեն «Հող` խաղաղության դիմաց» կարգավիճակը: Մենք որևէ ժամանակ հող հանձնելու հարց չենք դրել, մենք միշտ էլ ընդունել ենք խաղաղությունը և պիտի ընդունենք խաղաղությունը, սակայն այդ խաղաղությունը մենք չենք կարող ստանալ`  հողերի վերադարձի մասին խոսելով: Դա ինքնին խաղաղության մտքին դեմ է, և այսօր բանակցության սեղանին նման թեմա դնելը կարող է վտանգել խաղաղությունը»,- նշեց Շիրինյանը:

Մեր դիտարկմանը, թե արդյո՞ք դեսպան Միլսի հայտարարության մեջ պետք է փնտրել Արցախի հարցի հանգուցալուծման որևէ ակնարկ, թե՞ այն պետք է համարել պաշտոնից հեռանալիս արված ինչ-որ անհեթեթ հայտարարություն, նա պատասխանեց. «Պարոն Միլսի հայտարարությունը խիստ դատապարտելի է: Կարող եմ ավելին ասել` քաղաքական կոպիտ սխալ եմ համարում նրա կողմից: Կոպիտ սխալ ոչ միայն ԵԱՀԿ ՄԽ համանախագահների հանդեպ, ոչ միայն Արցախի ժողովրդի ձեռք բերած հաղթանակի հանդեպ կամ նրանց` ազատ ինքնորոշման իրավունքի սկզբունքի հանդեպ, այլև կոպիտ սխալ նույնիսկ սեփական կառավարության հանդեպ: Ինչ էլ լինի նրա անձնական կարծիքը, խոսելիս նա ներկայացնում է ԱՄՆ կառավարության կեցվածքը, որովհետև նա այդ երկրի դեսպանն է Հայաստանում: Իր այս հայտարարությամբ նա խախտում է այդ համախոհությունը, որ այսօր կա ԵԱՀԿ Մինսկի երեք համանախագահ երկրներում»:

Շիրինյանը նաև նշեց, որ ԱՄՆ-ը պետք է պաշտոնական հայտարարությամբ հանդես գա, որ դեսպան Միլսի հայտարարությունը նրա անձնական կարծիքն է, այլ ոչ թե պաշտոնական ԱՄՆ-ի դիրքորոշումն այս թեմայի շուրջ:

«Ի վերջո, այսօր ԵԱՀԿ Մինսկի խմբի համանախագահ բոլոր երկրների ջանքերն այն ուղղությամբ են, որ հարցը խաղաղ հանգուցալուծում ստանա Հելսինկյան ակտից բխած երեք կետերից, որոնք են`ժողովուրդների ազատ ինքնորոշման իրավունքը, տարածքային ամբողջականության սկզբունքը և ուժի չկիրառումը, որոնք պետք է հարգվեն` ի շահ հիմնախնդրի խաղաղ հանգուցալուծման»,-նշեց նա:

Շիրինյանը ընդգծեց նաև` այսօր հայկական կողմը բանակցելու բան չունի հող կամ տարածք զիջելու մասին: «Այսօր  մեր առաջնահերթությունը հստակ է` ինչպե՞ս ներգրավել Արցախի ժողովրդին, Արցախի պետությունը, Արցախի իշխանություններին բանակցությունների մեջ: Ի վերջո, այդ տարածքում ապրող ժողովուրդն է, որ որոշելու է իր ապագան, և  նրա ձայնն ու կարծիքները պետք է լսելի ու հասանելի լինեն»,- եզրափակեց նա:

Հիշեցնենք, որ երեկ EVN Report-ին տված հարցարույցի ընթացքում ԱՄՆ դեսպան Ռիչարդ Միլսը սենսացիոն հայտարարություն էր արել` նշելով, որ «գրավյալ որոշ տարածքների վերադարձն անխուսափելի է»: Նշենք, որ Միլսի պաշտոնավարման ժամկետը շուտով կավարտվի:

Ընտրակաշառք` Փաշինյանից
17 Նոյեմբերի 2018, 19:19 Ընտրակաշառք` Փաշինյանից
Հարցեր՝ Իշխան Սաղաթելյանին
17 Նոյեմբերի 2018, 11:12 Հարցեր՝ Իշխան Սաղաթելյանին
yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica