close
Եղանակը Երևանում
25 Մայիսի 2018
+21°
+22°Ցերեկ
+15°Գիշեր
weather
close
Փոխարժեք
25 Մայ 2018
USD1482.65
GBP1646.46
EUR1566.10
RUB17.86
close

ՀՀ, ք. Երևան Հանրապետության փ. 30

+374 10 52 15 01
ՎԵՐԵՎ

ՀՅԴ ուղեգիծը միշտ նույնն է եղել, մենք երբևիցե չենք փոխվել. Վազգեն Մանասյան

Հարցազրույց

6 Մարտի 2017, 17:22
 ՀՅԴ ուղեգիծը միշտ նույնն է եղել, մենք երբևիցե չենք փոխվել. Վազգեն Մանասյան

Yerkir.am-ի զրուցակիցը ՀՅԴ համամասնական ցուցակի 19-րդ հորիզոնականում գտնվող Վազգեն Մանասյանն է:

- Ի՞նչն  է ստիպում Վազգեն Մանասյանին` մասնակցել խորհրդարանական ընտրություններին, մտնել քաղաքականություն:

- ՀՅԴ անդամ եմ վաղուց: Երկրի ներքին և արտաքին խնդիրները չեն կարող չանհանգստացնել ինձ, և ես դրանց կողքով չեմ կարող անտարբեր անցնել, հետևաբար` դրանց  լուծման հիմնական եղանակը քաղաքականության մեջ լինելն է: Հիմա անցում ենք կատարում խորհրդարանական կառավարման համակարգի, ուստի պետք է խորհրդարանում ավելի շատ ու ուժեղ ներկայացվածություն ունենանք, որպեսզի կարողանանք այդ ներքին ու արտաքին բոլոր խնդիրներն ու մարտահրավերները լուծել, այլ տարբերակ չկա:  

Այսօր ՀՀ-ում մեր առջև ծառացած բազում խնդիրներ կան: Ես` որպես երիտասարդ սերնդի ներկայացուցիչ, համարում եմ, որ խորհրդարանում պիտի ավելի շատ ներկայություն ապահովեն մեր ժողովրդի երիտասարդ ներկայացուցիչները: Երիտասարդությունն այն ուժն ունի, որ կարող է գալ և այդ խնդիրները լուծել: Երիտասարդությունը կախում չունի, երիտասարդությունը նոր մտքերի, նոր գաղափարների կրող է, և ես, տեսնելով այն խնդիրները, որոնց բախվում են երիտասարդները, ունենալով  այդ խնդիրների լուծման հստակ մեխանիզմները, որոնք տալիս է Դաշնակցության պլատֆորմը, ուզում եմ մասնակցել ընտրություններին:  Վստահ եմ, որ երիտասարդության այն հատվածի հետ, որն այսօր  կանգնած է Դաշնակցության կողքին, մեր առջև ծառացած խնդիրներին լուծում կտանք: Մենք  ուժեղ, հզոր զարգացած պետություն ունենալու տեսլական ունենք և այդ տեսլականին հասնելու համար պիտի հենց այս ընտրություններում ցույց տանք մեր իրական կարողությունները:

Խորհրդարանական կառավարման համակարգը շատ լավ բան է, դրանով է վերջ տրվելու միանձնյա որոշումներ կայացնելու համակարգին: Երկրի ներքին ու արտաքին խնդիրների զարգացման պատասխանատուն արդեն ԱԺ-ն է լինելու, ուստի, խորհրդարանում  ապահովելով հստակ ներկայություն, պատգամավորների ավելի մեծ թիվ ունենալու դեպքում մեր կուսակցությունը կշարունակի իր իսկ սկսած փոփոխությունները հասցնել վերջնական նպատակին:

 - Քաղաքականություն մտնելը, կուսակցական լինելը չի՞ սահմանափակում երիտասարդի ազատությունը:

- ՀՅԴ անդամ լինելով` իհարկե, ոչ, չի կարող սահմանափակվել իմ ազատությունը, որովհետև իմ գաղափարները, իմ ազատամտությունն ուղիղ համեմատական է Դաշնակցության գաղափարախոսությանը: Չեմ կարծում, որ եթե երիտասարդը որոշում է մտնել քաղաքականություն, քաղաքականության մեջ իրեն դրսևորել, բերել նոր գաղափարներ, նոր ծրագրեր, որոնք ուղղված են երկրի կայունացմանն ու զարգացմանը, կարող է սահմանափակվել կուսակցական պատկանելությունից: Դաշնակցական լինելը հնարավորություն է ներկայանալու, սեփական ուժերը ներդնելու այդ ամեն ինչի իրագործման մեջ: Դեռ հակառակը` ոչ թե սահմանափակում  է  ազատությունը, այլ ավելի լայն դաշտ է բացում` դրսևորվելու,  ունակությունները ցուցաբերելու համար:

- Նշեցիր, որ երկրում կան բազում խնդիրներ, երիտասարդներն էլ ունեն բազմաթիվ խնդիրներ: Դու` որպես երիտասարդ սերնդի ներկայացուցիչ, ի՞նչ ես առաջարկում, որ երիտասարդը Հայաստանում մնալու և ապրելու ցանկություն ունենա:  

- Երկրի զարգացումն ու կայունությունն ապահովելը չի կարելի ինչ-որ մի ոլորտով սահմանափակել ու ասել` այս ոլորտը կարգավորելու դեպքում ամեն ինչ կընկնի իր տեղը: Շղթայական պրոցես է այդ ամենը, որ պիտի զրոյական մակարդակից սկսվի և հասցվի այն մակարդակին, որ բոլոր ոլորտներում լինի այնպիսի կայունություն, որ երիտասարդի մոտ արտագաղթելու ցանկություն չառաջանա:  Այսօր Երիտասարդը  սովորելուց, բարձրագույն կրթություն ստանալուց հետո հասնում է  մի կետի, որ հնարավորություն չի ունենում դրսևորելու իր ունակությունները, այսինքն` շղթայական ռեակցիայով գնում է: Ընդհանուր համակարգի մինուսներից մեկն այն է, որ մեր երիտասարդները հասկանում են` այստեղ անելիք չունեն, ու գնում են դուրս: Ես շեշտեցի` շղթայական պրոգրես, այստեղից գալիս է շղթայի մյուս հատիկը, որը բերում է արտագաղթի: Տարբեր պետություններում, որ ոլորտում ուզում է նայենք, հայ երիտասարդները շատ լավ դրսևորել են իրենց ու շատ ձեռքբերումներ ունեն: Շղթայական ռեակցիայով նայում ենք, հասկանում` մենք շատ  բաց տեղեր ունենք: Դաշնակցությունն իր պլատֆորմով ներկայացնում է, հստակ ցուցումներ է տալիս, թե որտեղ կա սխալ, որտեղ պետք է շտկել, ու վերահսկման մեխանիզմներով ցույց ենք տալիս, որ հենց նույն երիտասարդները, որոնցից մեկն էլ ես եմ, իրենց ապագան տեսնեն իրենց երկրում, որպեսզի երբևիցե չմտածեն արտագաղթի կամ այլ պետություն գնալու մասին, թեկուզ` արտագնա աշխատանքի, որովհետև այն աշխատանքը, որը ես կարող եմ անել այլ պետությունում ու զարկ տալ այդ պետության տնտեսությանը, ես կանեմ իմ երկրում` սեփական երկրիս ու սեփական ժողովրդիս համար:

- Խոսեցիր ՀՅԴ պլատֆորմից, նշեցիր, որ կուսակցության ծրագիրն ապահովում է խնդիրների լուծում: Բայց ոչ մի կուսակցություն վատ ծրագիր չի ներկայացնում: Ընտրողն ինչպե՞ս կողմնորոշվի, ինչո՞ւ պետք է  ձեր ծրագրի օգտին քվեարկի:

- Եթե նայենք բոլոր քաղաքական ուժերի պլատֆորմները, կտեսնենք  իրար նման շատ կետեր, լուծումներ և մտածողություն: Եթե մենք նայենք անցած ընտրություններին Դաշնակցության ներկայացրած պլատֆորմներին, կհասկանանք, որ մեր ուղեգիծը միշտ նույնն է եղել, մենք չենք փոխվել երբևիցե, չենք խոստացել ու մեր խոստումը թողել օդում, միշտ հետևողական ենք եղել այն բանին, ինչ ներկայացրել ենք ժողովրդին: Մեր պլատֆորմի յուրահատկությունը կներկայացնեմ հետևյալ կերպ` եթե մյուս քաղաքական ուժերը ներկայացնում են խնդիր և լուծում են տալիս դրան թղթի վրա, ապա Դաշակցությունը տալիս է հստակ լուծում, տալիս է նաև այդ լուծմանը հետևող և ուղղորդող մեխանիզմներ, որպեսզի լուծումը հասնի իր վերջնական կետին: Մեր ծրագրում նշված բոլոր կետերը ՀՀ զարգացմանն ու հզորացմանն են ուղղված, ու մեր քաղաքական  գործիչները, ովքեր զբաղեցնում են պաշտոններ, իրենց գործունեությամբ արդեն ապացուցել են դա: Մենք միայն չենք խոսում, մենք իրագործում ենք:  Այդ ամենը շատ հստակ ու պարզ երևում է թե’ կրթական համակարգում, թե' տարածքային կառավարման համակարգում և թե' բնապահպանության ոլորտում տեղի ունեցող փոփոխություններում:  

- Ազգային ժողովում ինչի՞ պակաս ես տեսնում:  

- ԱԺ-ում քաղաքական ուժերի ներկայացուցիչներ կան, ովքեր արդեն սպառել են իրենց, կան քաղաքական գործիչներ, ովքեր երբևիցե չեն լծվել այդ աշխատանքին: Այսօր գործադիրից ավելի շատ են գալիս օրենսդրական նախագծեր, քան տեղում պետք է արվեր: Դա նշանակում է, որ մեր օրենսդիր մարմնի ներկայացուցիչներն ուղղակի անգործության են մատնված, չեն աշխատում այդ ուղղությամբ: Ազգային ժողովի քառօրյա նիստերը դիտելիս էլ հասկանում ենք, որ քիչ թվով պատգամավորներ են  մասնակցում, նույնիսկ քվորում չի ապահովվում, դա խոսում է պատասխանատվություն վերցնելու ու դրա կատարումից խուսափելու մասին: Այսինքն` եթե Ազգային ժողովի պատգամավորը պիտի մեկ տարվա ընթացքում ոչ մի նիստի չմասնակցի, ոչ մի ելույթ չունենա, ոչ մի օրենսդրական փոփոխության կամ ոչ մի օրենքի մշակման մեջ ինչ-որ ներդրում չունենա, այդպիսի պատգամավոր ժողովրդին պետք չէ: Ազգային ժողովը մի տեղ է, որտեղ հարկավոր են մարդիկ, ովքեր պետք է մեր երկրի զարգացման լոկոմոտիվը լինեն:

-  Ընտրություններում ո՞րն է լինելու ձեր հաղթաթուղթը:

- Դաշնակցությունը միշտ եղել է ժողովրդի կողքին, իր գործողություններով միշտ ապացուցել է, որ հայ մարդը Դաշնակցության համար ամենակարևոր բանն է: Հայ ազգի զարգացմանն ուղղված մեր գործողությունները պիտի դառնան հաղթաթղթի մի մասնիկը: Հաղթաթղթի մի մասնիկ պետք է դառնա ՀՅԴ-ի անցած ուղին: Մենք բազմիցս ապացուցել ենք, որ կոչված ենք հայապահպանության, հայ ազգի հզորացման համար, միացյալ, ազատ, անկախ Հայաստան կերտելու գաղափարը միշտ առաջնային է լինելու մեզ համար, մենք միշտ դրա հետ կապված բոլոր գործողություններն արել ենք, անելու ենք: Հաղթաթղթի ևս մեկ մասնիկ է այն, որ շատ խնդիրներ արդեն իսկ լուծում ստացել են Դաշնակցության անմիջական ջանքերով: Ավելորդ ոչ մի բան չեմ նշի, կնշեմ հետևյալը` մենք հիմա պատմական կարևորություն ունեցող քայլ ենք կատարել` անցել ենք խորհրդարանական կառավարման համակարգի, որը ՀՅԴ-ի ներդրումն է:

- Ընտրությունների ելքի հետ կապված կանխատեսումներ ունե՞ք:

- Կանխատեսումներ ու ակնկալիքներ ունեմ, ու դա հենք ունի, օդից վերցրած չէ: Թվեր չեմ փորձի ասել, թե ինչ տոկոս կհավաքենք, բայց 5 տոկոսի մասին կարելի է  մոռանալ, մենք ավելի շատ ենք հավաքելու: Այս վստահությունը մեր անցած ուղին է, մեր գործողություններն են, մեր արած գործերը:

 

Զրուցեց Ամալյա Առաքելյանը 

yerkir.am
Այս բաժնի այլ նորությունները
Ամենաշատ ընթերցվածները
Yandex.Metrica